३३ वर्षअघि दुई जना महिलालाई कोठीमा बेच्ने पुरुष ५७ वर्षको उमेरमा

जीउ मास्ने बेच्ने मुद्दाका एक जना फरार प्रतिवादीलाई प्रहरीले समातेको छ । पक्राउ पर्नेमा उदयपुर कटारी नगरपालिका–३ बस्ने पर्सा साविक ठोरी गाविस–९ घर भएका ५७ वर्षीय विष्णु बहादुर थापा हुन् ।

उनले २०४६ भदौ १८ गते दुई जना महिलालाई भारतको मुम्बईको कोठीमा पुर्याएर बेचेका थिए ।

सोही घटनामा जिल्ला प्रहरी कार्यालय पर्साबाट जीउ मास्ने बेच्ने मुद्दा दर्ता भई अनुसन्धान तथा अभियोजन पश्चात् पर्सा जिल्ला अदालतले २०६१ चैत १४ गते उनलाई १० वर्ष कैद र २५ हजार रूपैयाँ जरिवाना सजाय सुनाएको थियो । त्यसपछि उनी फरार भएका हुन् ।

थापालाई जिल्ला प्रहरी कार्यालय पर्साबाट खटिएको टोलीले उदयपुर कटारी नगरपालिका–३ मा लुकीछिपी बसिरहेको अवस्थामा थापालाई पक्राउ गरेको हो । उनलाई फैसला कार्यान्वयनको निम्ति पर्सा जिल्ला अदालतमा बुझाउने काम भइरहेको छ ।