दुलही लिन गएका दुलाहा पुलिस खोरमा

भनेजति दाइजो नपाएकोमा बेहुली छाडेर फर्किएका दुलाहा प्रहरी हिरासतमा पुगेका छन् । दाइजोमा मोटरसाइकल नपाएको रिसले दुलही नलिई हिँडेका झापाका डेभिड चौधरी बिहेकै दिन प्रहरी खोरमा पुगेका हुन् ।

जिल्ला प्रहरी कार्यालय झापाका प्रहरी प्रवक्ता वसन्त पाठकका अनुसार उनी दाइजोस्वरुप मोटरसाइकल माग्दा हिरासतमा पुगेका हुन् । झापाका चौधरी हिजो मेचीनगर नगरपालिका–१५ मा पुष्पलाल राजवंशीकी छोरी (बेहुली) लिन जन्तीसहित गएका थिए ।

तर, दाइजो नदिए बेहुली नलाने भनेपछि त्यहाँ पुगेको प्रहरीले चौधरीलाई पक्राउ गरेको प्रवक्ता पाठकले बताए । उनीविरुद्ध दाइजोसम्बन्धी कसूरमा अनुसन्धान थालिएको छ ।