आमाको हत्या गरेर भागेको छोरो समातियो

सुनसरीमा आमाको हत्या गरेको आरोपमा एक युवक समातिएका छन् । धरान उपमहानगरपालिका १४ विजयपुरका २५ वर्षीय सौगात सुवेदीलाई आज प्रहरीले नियन्त्रणमा लिएको हो ।

हात्तीसार कलेज धरानको क्वार्टरमा बस्ने झापा चन्द्रगढी घर भएकी ४२ वर्षीया शान्ता सुवेदीलाई शनिबार छोराले धारिलो हतियारले टाउकोमा हानेका थिए । त्यसबाट गम्भीर घाइते भएकी उनको विराटनगरको न्युरो अस्पतालमा उपचार हुन नसकेपछि घर लैजाँदै गर्दा बाटोमै मृत्यु भएको थियो ।

घटनालगतै फरार मृतकका छोरा सौगातलाई जिल्ला प्रहरी कार्यालय धरानबाट खटिएको टोलीले पक्राउ गरेको हो ।