श्रीमतीलाई औषधि किन्न गएका विष्णु साइकलसहित इनारमा

सिरहामा हत्या गरी इनारमा फालिएको अवस्थामा एक जनाको शव फेला परेको छ । गोलबजार नगरपालिका–२, टुड्कियाका ५० वर्षीय बिष्णुदेव साहको शव आज बिहान इनारभित्र भेटिएको हो ।

साह हिजो अपरान्ह श्रीमतीको निम्ति औषधि लिन घरबाट साइकलमा निस्केका थिए । उनी राति अबेरसम्म पनि नफर्किएपछि खोजतलास गरिएको थियो । खोज तलासकै क्रममा आज बिहान गाउँ नजिकैको इनारभित्र साइकलसहित उनको शव फेला परेको इलाका प्रहरी कार्यालय गोलबजारका प्रमुख प्रहरी निरीक्षक राजु केसीले बताए ।

मृतक साहको टाउकोमा गहिरो चोट लागेका कारण हत्याको आशंका गरिएको प्रहरी निरीक्षक केसीले बताए । यद्यपि, पूर्ण जानकारी अनुसन्धानपछि मात्रै आउने उनको भनाइ छ ।