४ जना चिनियाँ नागरिकले बोरामा हालेको ४ करोड रुपैयाँ फेला

काठमाडौंको नागढुंगाबाट स्रोत नखुलेको तीन करोड ८९ लाखभन्दा बढी रुपैयाँसहित चिनियाँ नागरिक समातिएका छन् । चन्द्रागिरी नगरपालिका–२ स्थित नागढुंगाबाट उनीहरु पक्राउ परेका हुन् ।

नुवाकोटबाट काठमाडौं आउँदै गरेको बीएबी ५७१० नम्बरको कारमा सवार उनीहरुको साथमा स्रोत नखुलेको तीन करोड ८९ लाख १३ हजार सात सय २० रूपैयाँ फेला परेको प्रहरीले जनाएको छ ।

प्रहरी प्रभाग नागढुंगा र लागूऔषध नियन्त्रण व्युरोबाट खटिएको संयुक्त टोलीले चेक जाँच गर्ने क्रममा कारको डिक्कीबाट रकम भेटिएको हो । प्लाष्टिकको बोरामा लुकाएर ल्याइएको उक्त नगदसहित चालक उनीहरु पक्राउ परेका हुन् ।

नुवाकोटको विदुर नगरपालिका–८ बस्ने ४४ वर्षीय फूलबहादुर गुरुङ कार चालक रहेको बताइएको छ ।