तरकारी बजारमा बालकहरुले सुन चोरे

रुपन्देहीमा नाबालकलाई प्रयोग गरी सुनको सिक्री चोरेको आरोपमा तीन जना समातिएका छन् । पक्राउ पर्नेमा पर्साको पटेर्वा सुगौली घर भई अहिले रुपन्देहीको कञ्चन गाउँपालिका–४, हर्नाचौर बस्ने ३६ वर्षीय विजय राय नट, ११ वर्षीय र १२ वर्षीय नाबालक छन् ।

उनीहरुलाई कञ्चन गाउँपालिका–४ वनकसिया डिहोबाट प्रहरीले चोरिएको सुनको सिक्रीसहित पक्रेको हो । वनकसियास्थित हाटबजारमा टमाटर किन्ने क्रममा सोही ठाउँ बस्ने ७० वर्षीया महिलाको तीन तोला ४० लाल बराबरको सुनको सिक्री चोरेर दुई नाबालक भागेका थिए ।

विजयले करिब एक महिनाअघि ती दुई नाबालकलाई सुनको सिक्री कसरी चोर्ने र कसरी भाग्ने भनी सिकाई बजारमा भिडभाड भएको ठाउँमा लगी बालबालिकालाई प्रयोग गरी चोरी गर्ने गराउने गरेको प्रहरीको प्रारम्भिक अनुसन्धानबाट खुलेको छ ।