गणतन्त्र दिवसमा कैद माफीमा छुटेकाले फेरि खुकुरी प्रहार गरे

गत वैशाखमा चितवनको खैरहनीमा खुकुरी प्रहार गरेर भागेका सोचेन्द्र राईलाई प्रहरीले काठमाडौंमा पक्रेको छ । उतले गत वैशा २४ गते मध्यरातमा खैरहनी ६, सुनगाभाटोलका ३५ वर्षे कुमार थापा मगरलाई निजकै घरमा धारिलो हतियार प्रहार गरी गम्भीर घाइते बनाएका थिए ।

राई उक्त घटनाका मुख्य अभियुक्त हुन् । चितवनकै राप्ती नगरपालिका ४ खहरेपुल बस्ने वर्ष ३० का यक्स भन्ने सोचेन्द्र राई घटनापछि फरार भए । जिल्ला अदालत चितवनले असार २७ गते पक्राउ पूर्जी जारी गरेको थियो ।

सोही क्रममा जिल्ला प्रहरी कार्यालय चितवनबाट खटिएको टोलीले हिजो राईलाई काठमाण्डौको तारकेश्वर १० मनमैजुबाट खुकुरी एक थान, मोबाइल सेट सात थान र टेलिफोनका सिमकार्ड नौ थानसहित फेला पारेर जितवन जिल्ला अदालतसमक्ष पेश गरिएको हो ।

राई विगतमा समेत अपराधिक गतिविधिमा संलग्न रहेको पाइएको छ । उनी यसअघि कर्तव्य ज्यान–१, डाँका–१, चोरी–३ गरी पाँच वटा मुद्दामा संलग्न थिए । पटक पटक कारागारमा कैद बसेर पछिल्लो पटक ११ वर्ष कारागारमा कैद भुक्तान गरेका उनी अघिल्लो वर्ष जेठ १५ गतेका दिन गणतन्त्र दिवसमा छुटेका थिए ।