झण्डै करोडका अवैध सामान बोकेको ट्रकमा एक हजार केजी कपाल

झापामा बिल बिजक अनुरुप नभएका विभिन्न किसिमका सामान बोकेको ट्रकसहित चालकलाई नियन्त्रणमा लिइएको छ । गौरादह नगरपालिका ७ बाट सशस्त्र प्रहरी बलले ९४ लाख ४८ हजार रुपैयाँ बराबरको बिल नभएका सामान बोकेको ट्रकसहित उनलाई पक्रेको बताइएको छ ।

बिर्तामोड नगरपालिका ७ बस्ने ४४ वर्षीय धनीलाल राजवंशीलाई सशस्त्र प्रहरी बलको नम्बर २ गण झापा र सुरक्षा वेश बैगुनधुराले पक्रेको हो ।

काठमाडौंतर्फ आउँदै गरेको ना.७ ख २१९६ नम्बरको ट्रकमा राखिएको उक्त मूल्य बराबरको नौ सय ९० केजी रेडिमेड कपाल, लत्ताकपडा, स्टेशनरी, किराना, इलेक्ट्रिकल तथा फर्निचरका सामान नियन्त्रणमा लिइएको सशस्त्र प्रहरीले जनाएको छ । बरामद ट्रकसहित राजवंशीलाई आवश्यक कारवाहीका लागि राजश्व अनुसन्धान कार्यालय इटहरीमा बुझाइएको छ ।