दुबईमा आकर्षक जागिर लगाउने आश्वासन दिएर रकम कुम्ल्याउने कार्की समातिए

दुबई पठाएर आकर्षक जागिर लगाइदिने आश्वासन दिएर लाखौँ रकम ठगी गर्ने एक जना समातिएका छन् । काठमाडौं टोखा बस्ने सिन्धुपाल्चोकको सुनकोशी गाउँपालिका–७ खाडिचौरका २७ वर्षीय अविनाश कार्कीलाई ठगीको आरोपमा प्रहरीले आज पक्रेको हो ।

दैलेख दुल्लु घर भएका एक पुरूषलाई वर्किङ भिषामा दुबई जानको लागि साढे ७ लाख रूपैयाँ लाग्ने र त्यहाँ प्रतिष्ठित कम्पनीमा आर्मस् गार्डको काम लगाईदिने प्रलोभन उनले देखाएका थिए । मासिक एक लाख रूपैयाँसम्म तलव हुने विश्वास दिलाई ७ लाख ५० हजार रुपैयाँ लिएर फरार भएको पीडितको उजुरीका आधारमा काठमाडौं उपत्यका अपराध अनुसन्धान कार्यालयबाट खटिएको प्रहरीले कार्कीलाई गोङ्गबुबाट पक्राउ गरेको हो ।

उनलाई थप अनुसन्धान तथा कारवाहीको लागि वैदेशिक रोजगार विभाग बुद्धनगर काठमाडौँ पठाइएको छ ।