एटिएम फुटाएर भाग्दाभाग्दै पक्राउ

पोखरामा एटिएम फोडी नगद चोरेर भागेका एक युवा समातिएका छन् । नवलपरासी(पूर्व) देवचुली नगरपालिका–५ घर भई पोखरा महानगरपालिका–३० डाँडाको मुख बस्ने भेडे भन्ने २१ वर्षीय अनिश तामाङलाई जिल्ला प्रहरी कार्यालयको टोलीले रुपन्देहीको बेलहियाबाट आज पक्राउ गरेको हो ।

तामाङ्गले पोखरा महानगरपालिका–२७ स्थित एनआइसी एसिया बैंकको एटिएम मेशिन तोडफोड गर्न खोजेको र सोही बैंकको अर्को एटिएम मेशिन फोडी गत साउन ३ गते नगद चोरी गरेको घटना अनुसन्धानको क्रममा उनलाई पक्राउ गरेको प्रहरीले जनाएको छ ।

तामाङ्गको साथबाट घटनामा प्रयोग गरेका १० प २९६३ नम्बरको मोटरसाइकल र दुई वटा क्यासकेट बरामद गरेको छ । उनलाई नियन्त्रणमा लिएर चोरी तथा डाँकासम्बन्धी कसूरमा जिल्ला अदालत कास्कीबाट सात दिनको म्याद थप गरी आवश्यक अनुसन्धान गरिरहेको प्रहरीले बताएको छ ।