चोलेन्द्रले नाम पोलेका श्रीमानहरुको संसदीय समितिलाई जवाफ : हामी आउन मिल्दैन

सर्वोच्च अदालतको फूलकोर्ट बैठकले संसदीय सिफारिस समितिमा न्यायाधीशहरु जवाफका लागि उपस्थित नहुने निर्णय गरेको छ । निलम्बित प्रधानन्यायाधीश चोलेन्द्रसमशेर राणाले बयानका क्रममा न्यायाधीशहरुको नाम पोलेपछि समितिले पत्र काटेर जवाफका लागि बोलाएकोमा सर्वोच्चले न्यायाधीशहरु संसदीय समितिमा उपस्थित हुन नमिल्ने जानकारी गराइएको हो ।

समितिले कामु प्रधानन्यायाधीश दिपक कार्की,दोश्रो वरियताका हरिकृष्ण कार्की, चोलेन्द्रले सबैभन्दा धेरै आक्षेप लगाएका न्यायाधीश प्रकाशमानसिंह राउत,ईश्वर खतिवाडा, डा.आनन्दमोहन भट्टराई र हरि फुयाँललाई आज पत्र लेखेर बयानका लागि भोलि बिहान उपस्थित हुन भनेको थियो ।त्यसलगत्तै बसेको फुलकोर्ट बैठकले न्यायाधीशहरू त्यसरी समितिमा जानु शक्ति पृथकीकरणको सिद्धान्त विपरित हुने भएकाले उपस्थित नहुने निर्णय गरी त्यसको लिखित जानकारी समितिलाई पठाएको हो।

चोलेन्द्रले बयानका क्रममा अदालतमा बेथिति बढ्नुमा ६ जना सहकर्मी न्यायाधीशको भूमिका रहेको गम्भीर आरोप लगाएका थिए ।