नक्सा परिवर्तन गरेको आरोपमा चार जनामाथि भ्रष्टाचार मुद्दा

अख्तियार दुरुपयोग अनुसन्धान आयोगले नापी कार्यालय, रुपन्देहीका तत्कालीन नापी अधिकृत घनश्याम दुवेसहित चार जनामाथि भ्रष्टाचार मुद्दा दायर गरेको छ । विशेष अदालतमा दायर गरिएको मुद्दामा दुवे र सर्भेक्षक ठाकुरप्रसाद गुरौसमेत चार जनाले सरकारी कागजात सच्याएर भ्रष्टाचार गरेको अख्तियारको दाबी छ । 

उनीहरुले रुपन्देही जिल्लाको साबिक सेमलार गाविस वडा नम्बर २ (ग), कित्ता नम्बर ३५९४ कित्ताकाट गरेर कित्ता नम्बर ४१९१ र ४१९२ कायम गरेका थिए । त्यसपछि कित्ता नम्बर ४१९१ लाई कित्ता नम्बर ३४३४ र कित्ता नम्बर ३५८८ को बीचमा घुसाएर कित्ता नम्बर ३४८३ को क्षेत्रफल घटाई नक्सा परिवर्तन गरेको देखिन आएको हो । 

सरकारी निकायको कागजातमा अनाधिकार वा गैरकानूनी तरिकाले सच्याउने वा हेरफेर गर्ने कार्यलाई प्रमाणित गरी भ्रष्टाचार निवारण ऐन, २०५९ को दफा ११ बमोजिमको कसूर गरेको अख्तियारको दाबी छ । आयोगको विज्ञप्तिमा रुपन्देहीको साविक सेमलार गाविस वडा नम्बर २ ग, कित्ता नम्बर ३४८३ को ११ धुर क्षेत्रफल खरिद गरिएकोमा उक्त जग्गाधनीको कुनै अनुमति नलिइ र जानकारी नगराई कार्यालयका कर्मचारीहरुले पछाडिको मोहडातर्फबाट ३ धुर क्षेत्रफल जग्गा उक्त कित्ताबाट हटाएर नक्सा परिवर्तन गरेको भन्ने उजुरी निवेदन सम्बन्धमा अनुसन्धान हुँदा उनीहरु दोषी देखिएको उल्लेख  छ ।  

त्यसैगरी बुटवल उपमहानगरपालिका १३ बस्ने शक्तिप्रसाद सापकोटा र पुष्पा सापकोटाले आफूहरुले फाइदा गर्ने उद्देश्यले कित्ता नम्बर ३४८३ को क्षेत्रफल घटाई दुबे र गुरौलाई नक्सा परिवर्तन गर्ने कार्यमा सहयोग गरेको भन्दै उनीहरुलाई पनि मुद्दामा विपक्षी बनाइएको अख्तियारले जनाएको छ । गुरौ र दुवे दुबैजना अहिले सरकारी सेवाबाट अवकास भईसकेका छन् ।