बहुमतको कारवाहीमा परेका मेयरको पक्षमा एमालेको नारावाजी

सिरहाको गोलबजार नगरपालिकाका मेयर श्याम श्रेष्ठमाथि हिजो भएको आक्रमणको विरोधमा नेकपा एमालेका कार्यकर्ता आज सडकमा ओर्लिएका छन् । आक्रमणकारीलाई तत्काल कारवाहीको माग गर्दै एमाले युवाहरु आन्दोलनमा उत्रिएका हुन् । उनीहरुले गोलबजारस्थित राजमार्गमा टायर बालेर सडक अवरुद्ध पारेका छन् ।   

एमालेबाट निर्वाचित मेयर श्रेष्ठमाथि हिजो मोबिल आक्रमण भएको थियो । प्रमुख प्रशासकीय अधिकृतको कार्यकक्षबाट निस्किएर गाडी चढ्ने बेला एकजना अपरिचित व्यक्तिले केही कागज दिएजस्तो गरिरहेकै बेला सँगै आएका अर्का व्यक्तिले मेयर श्रेष्ठमाथि मोबिल छ्यापेका थिए । त्यहाँ नेकपा (बहुमत)को जनसंघर्ष परिचालन समितिको पर्चासमेत भेटिएको थियो ।  

मेयर श्रेष्ठले लघुवित्तमार्फत् गरिब जनतालाई उठिवास लगाएको, मिटर व्याजीहरुलाई संरक्षण गरेको,  बजारको करमा एक करोड ५२ लाख ब्रम्हलुट गरेको भन्दै जनकारवाही गरेकाे पर्चामा उल्लेख गरिएको छ ।

त्यस्तै, फर्जी कागज बनाई गोलबजार- १ मुक्सार बाटोको ६२ लाख हिनामिना गरेको, अवैधानिक तरिकाले नदी दोहन गरेको, अन्यायपूर्ण तरिकाले नगरपालिकामा कार्यरत कर्मचारी हटाइएको र आफ्ना नेता-कार्यकताविरुद्ध सुराकी गरेकोले उनलाई जनकारवाही गरेको जनाइएको छ ।

बहुमतको 'जनकारवाही'मा परेका मेयर श्रेष्ठ पूर्वमन्त्री तथा एमालेका सांसद लिलानाथ श्रेष्ठका भाइ हुन् । प्रहरीले यस घटनमा संलग्न रहेको आरोपमा सिराहाकै नहरा गाउँपालिकाका साधुशरण महरालाई पक्राउ गरेको छ । उनी विप्लव नेतृत्वको नेपाल कम्युनिष्ट पार्टीबाट फुटेको नेकपा (बहुमत)को कार्यकर्ता भएको बताइएको छ ।