डेंगी रोक्न स्वास्थ्य मन्त्रालयको ‘साढे १० बजे १० मीनेट अभियान’

स्वास्थ्य तथा जनसंख्या मन्त्रालयले ‘हरेक शुक्रबार बिहान साढे १० बजे १० मीनेट अभियान’ सञ्चालन गर्न अनुरोध गरेको छ । डेंगु नियन्त्रणको उपायस्वरूप भोलिदेखि अभियान थाल्न लागिएको बताइन्छ । 

मन्त्रालयले डेंगी संक्रमण रोकथाम तथा नियन्त्रणका निम्ति सबै सरकारी तथा सार्वजनिक निकायहरुलाई आफ्नो कार्यालय हाताभित्र उक्त अभियान अनिवार्य रुपमा सञ्चालन गर्न भनेको छ । आज विज्ञप्ति जारी गर्दै मन्त्रालयका सहप्रवक्ता डा.समिरकुमार अधिकारीले डेंगी संक्रमणको रोकथाममा सामूहिक प्रयासका लागि यो अभियान प्रभावकारी हुने विश्वास लिएका छन् । 

यस वर्ष पनि डेंगी संक्रमण बढ्न सक्ने भन्दै मन्त्रालयले आफ्नो बासस्थान एवम् कार्यस्थल वरिपरि लामखुट्टेको वृद्धि हुन नदिन सरसफाई गर्ने यस अभियानको उद्देश्य रहेको प्रष्ट्याएको छ । सहप्रवक्ता डा. अधिकारीका अनुसार डेंगी संक्रमण गराउने लामखुट्टे घर र कार्यालय वरिपरि थोरै वा धेरै मात्रामा जमेर रहेको स्थीर सङ्लो पानीमा अण्डा पारेर वृद्धि विकास हुने गर्छ । संक्रमित लामखुट्टेबाट जन्मने सबै लामखुट्टेले डेंगी संक्रमण गराउने गर्दछ । 

सबैको प्रयासले मात्रै डेंगी संक्रमण रोकथाम तथा नियन्त्रण गर्न सकिने भएकोले उक्त अभियानमा आम सर्वसाधारण, निजी क्षेत्र र सरोकारवाला सबै व्यक्ति तथा निकायहरुलाई आआफ्नो स्थानमा सहभागिता, सहजीकरण एवम् समन्वय गरिदिन मन्त्रालयले आग्रह गरेको छ ।