डेंगुको लक्षण देखिए तत्काल अस्पताल जान स्वास्थ्य मन्त्रालयको आग्रह

डेंगुको लक्षण देखिएमा तुरुन्त स्वास्थ्य चौकी जान स्वास्थ्य तथा जनसंख्या मन्त्रालयले आग्रह गरेको छ । पछिल्लो समय डेंगुका बिरामी बढ्दै गएको भन्दै मन्त्रालयले सतर्क हुन आग्रह गरेको हो । 

मन्त्रालयका अनुसार टाउको दुख्नु, थकाई लाग्नु, वाकवाकी लाग्नु, मांसपेशी तथा जोर्नी दुख्नु, वान्ता हुनु र एक्कासी ज्वरो आउनु डेंगु संक्रमणको लक्षण हो । 

त्यसैले, यस्ता लक्षण देखा परेमा तुरुन्त स्वास्थ्य चौकी जान मन्त्रालयले अभानेको छ । योसँगै डेंगु संक्रमणबाट जोगिन लामखुट्टेको टोकाइबाट बच्न पनि मन्त्रालयको सुझाव छ । 

मन्त्रालयले लामखुट्टेको टोकाइबाट बच्न झुल टाँगेर सुत्न, खेतबारीमा काम गर्दा लामो बाहुला भएको लुगा लगाउन, घरको झयाल ढोकामा जाली हाल्न आमसर्वसाधारणलाई आग्रह गरेको छ ।  

त्यस्तै, सम्भव भएसम्म लामखुट्टे भगाउने धूप वा मलमको प्रयोग गर्न, घरपालुवा पशुपंक्षी व्यवस्थित ढंगले पाल्न र घर वरिपरि गमला, टायर वा कुनै पनि खुला भाडामा पानी जम्न नदिन पनि मन्त्रालयको अनुरोध छ । 

डेंगु एडिस इजिष्टी एडिस आल्बोपिक्टस प्रजातिको पोथी लामखुट्टेको टोकाइबाट सर्ने संक्रमण रोग हो । गत वर्ष नेपालमा डेंगु संक्रमण अत्याधिक भएको थियो । डेंगु संक्रमणका कारण ८८ जनाले ज्यान गुमाउँदा ५४ हजार ७८४ जना संक्रमित भेटिएका थिए । 

त्यस्तै, काठमाडौँ उपत्यकामा त्यसबेला डेंगुले महामारीकै रुप लिँदा यसको नियन्त्रणमा सरकार चुकेको थियो ।