फरक रगत समूहको मिर्गौला प्रत्यारोपणमा नर्भिकको सफलता, विदेश जानुपर्ने बाध्यताको अन्त्य

काठमाडौँको थापाथलीमा रहेको नर्भिक इन्टरनेशनल हस्पिटल ‘एबीओ इन्कम्प्याटिभल रेनल ट्रान्सप्लान्ट’ मा सफल भएको छ । 

फरक ब्लड ग्रुपको व्यक्तिलाई फरक ब्लड ग्रुपको व्यक्तिबाट प्राप्त मिर्गौला ट्रान्सप्लान्ट गर्ने जटिल विधि नै एबीओ इन्कम्प्याटिभल रेनल ट्रान्सप्लान्ट हो । सामान्यतयाः मिर्गौला प्रत्यारोपणमा मृगौला फेल भएको व्यक्तिलाई उसैको ब्लड ग्रुपसँग मिल्ने व्यक्तिले मात्र मिर्गौला दिनसक्छ । 

पहिले त्यस्ता मिर्गौला मात्र प्रत्यारोपण हुँदै आएको नर्भिकमा हालै फरक ब्लड ग्रुुपबाट प्राप्त मिर्गौलाको जटिल मानिने प्रत्यारोपण समेत सफलतापूर्वक सम्पन्न भएको अस्पतालले जनाएको छ । मिर्गौला रोग विशेषज्ञद्वय डा. आरके अग्रवाल र डा. सुमित आचार्य तथा मृगौला प्रत्यारोपण सर्जन डा.राकेश बर्मालगायतको टोलीले निकै दुर्लभ र जटिल मानिएको उक्त प्रत्यारोपण गरेको हो ।

नर्भिकमा हालसम्म सतप्रतिशत सफलताको रेटसहित सात वटा मिर्गाैला प्रत्यारोपण भइसकेको छ । त्यसमध्ये छैठौं पटकको प्रत्यारोपण निकै जटिल र दुर्लभ रहेको डा.आचार्यले बताए । उनका अनुसार बिरामीको मिर्गौला प्रत्यारोपण अघिपछि उसको रगतमा एन्टिबडीको स्तर कम गर्न र दाताको मिर्गाैलालाई अस्वीकार गर्ने एन्टिबडीको जोखिम कम गर्न विशेष चिकित्सा उपचार विधि अपनाइएको थियो ।

यो उपचारमा रगतबाट एन्टिबडीहरु हटाउने (प्लाज्माफेरेसिस) गरिन्छ । सामान्य खालको मिर्गौला प्रत्यारोपणको तुलनामा यो विधि जटिल रहेकाले यसको शुल्क भने केही महंगो पर्ने बताइन्छ । मिर्गौला फेल भई नर्भिकमा उपचाररत ७२ वर्षीय एक पुरुष बिरामीलाई ६५ वर्षीया महिला दाताबाट प्राप्त मिर्गौला प्रत्यारोपण गरिएको हो । मिर्गौला प्राप्त गर्ने बिरामीको ब्लड ग्रुप ‘ओ’ थियो भने दाताको ‘ए’ थियो ।

नेपालको सन्दर्भमा यस्तो प्रत्यारोपण निकै दुर्लभ मानिन्छ । डा.आचार्यले यसरी जटिल विधिबाट उपचार गरी मिर्गाैला प्रत्यारोपण गरिएका ती व्यक्तिलाई छ दिनमै डिस्जार्च गरिएको बताए । उनका अनुसार हालसम्म नर्भिकमा यस्तो प्रत्यारोपण गरिएका अन्य बिरामीको पनि अवस्था सामान्य छ । ‘हामी सतप्रतिशत सक्सेस रेटसहित मिर्गौला प्रत्यारोपणमा नयाँ आयाम थप्दै अगाडि बढेका छौं,’ आचार्यले भने, ‘यस्ता हाइरिस्क ट्रान्सप्लान्टका लागि विदेश नै जानुपर्ने बाध्यता अब अन्त्य भएको छ । यो सबै नेपालीका लागि समेत खुशीको कुरा हो ।