शरणार्थी काण्ड अन्तर्राष्ट्रिय अपराध भएको स्वर्णिम वाग्लेको ट्विट, राष्ट्रसंघीय महासचिवदेखि अमेरिकी विदेशमन्त्रीलाई ट्याग

सांसद तथा अर्थशास्त्री डा. स्वर्णिम वाग्लेले नक्कली भुटानी शरणार्थी प्रकरण अन्तर्राष्ट्रिय अपराध भएको बताएका छन् । उनले ट्विट गर्दै उक्त अपराधबारे संयुक्त राष्ट्र संघका महासचिव, अमेरिकी विदेशमन्त्रीसम्मलाई जानकारी गराएका छन् । 

ट्विटमा भनिएको छ, ‘नेपाल पुलिसले हाल अनुसन्धान गरिरहेको यो गम्भीर अन्तर्राष्ट्रिय अपराध कुनै द्वेष बिना अघि बढ्नुपर्छ । संसारले हेर्नु पर्छ ।’

नेपाली काँग्रेसका नेता तथा पूर्वगृहमन्त्री बालकृष्ण खाँणदेखि सचिव, गृहमन्त्रीका सुरक्षाविद्, पूर्व उपप्रधानमन्त्रीका छोरालगायत ११ जना सोही प्रकरणमा पक्राउ परिसकेका छन् । एमाले सचिव टोपबहादुर रायमाझीलाई प्रहरीले फरार सूचीमा राखेको छ ।

यसबीचमा काँग्रेस सभापति शेरबहादुर देउवाकी श्रीमती तथा नेतृ डा. आरजू राणा देउवा, खाँणकी श्रीमती तथा सांसद मञ्जुसमेत मुछिएका छन् । राजनीतिक दलका शीर्ष नेताहरु भीआईपी आरोपितहरुलाई छुटाउन लागेको खबर बाहिरिएसँगै वाग्लेले उक्त ट्विट गरेका हुन् । 

उनले उक्त ट्विट राष्ट्रसंघीय शरणार्थी उच्चायुक्त फ्लिप्पो ग्राण्डी, काठमाडौंस्थित अमेरिकी दूतावास, प्रधानमन्त्री पुष्पकमल दाहाल प्रचण्ड, काँग्रेस सभापति शेरबहादुर देउवा, राष्ट्रिय स्वतन्त्र पार्टीका सभापति रवि लामिछानेलाई समेत ट्याग गरिदिएका छन् ।