बादलका सल्लाहकारलाई दलालको दुई करोड (अडियोसहित)

नेपालीलाई भुटानी शरणार्थी बनाएर अमेरिका पठाउने भन्दै करोडौँ कुम्ल्याउने प्रपन्चका एक हर्ताकर्ता तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई र बिचौलिया सानु भण्डारीबीच दुई करोड डिलको अडियो रेकर्ड बाहिर आएको छ । काठमाण्डौ जिल्ला अदालतमा थुनछेक बहस चलिरहँदा यस प्रकरणमा उनीहरु दुबैको संलग्नता पुष्टि हुने आधारसहितको सो अडियो रेकर्ड जनआस्थाले फेला पारेको हो । 

५१ सेकेन्ड लामो सो अडियो रेकर्डमा इन्द्रजितले 'समस्या पर्यो, के गर्ने हो' भनेपछि सानुले चिन्ता नगर्न आग्रह गर्दै 'दुई करोड ल्याइदिने" बाचा गरेको सुनिन्छ । अदालतमा इन्कारी बयान दिएका र प्रहरीलाई अनुसन्धानमा असहयोग गरेका इन्द्रजित केही तनावमा रहेको उनीहरुको कुराकानीबाट थाहा हुन्छ । 

'प्रधानमन्त्रीकोमा गएर, मन्त्रीलाई फोन गराएर, तपाईंहरु फयाट्ट हराईदिन्छ,मलाई कति गाह्रो पर्छ'

उनी भन्छन्, 'प्रधानमन्त्रीकोमा गएर, मन्त्रीलाई फोन गराएर, तपाईंहरु फयाट्ट हराईदिन्छ,मलाई कति गाह्रो पर्छ', तत्कालीन प्रधानमन्त्री केपी शर्मा ओली र गृहमन्त्री बादलमाथि समेत शंका हुनेगरी इन्द्रजितले भनेका छन् । चिन्ता नगर्न आश्वस्त पार्दै बिचौलिया भन्छन्, 'म हराउँदिन डाक्टर सा"ब, पर्सि तपाईंलाई दुई करोड ल्याएर बुझाइदिन्छु । काम बरु जे छ मिलेर गरौं !'

बिचौलियाले दुई करोडको कुरा गरेपछि डराएका इन्द्रजित 'फोनमा यस्तो कुरा नगर्न' सम्झाउँछन् । त्यसमा सहमत देखिएका सानु भण्डारी 'ल ल' भन्दै सही थाप्छन् । त्यसपछि इन्द्रजितले 'कहिले जाने हो' भनेर सोधेपछि सानुले 'म त बिहानै आइसकेँ नि डाक्टर सा"ब,निद्रा नै लागेन' भनेको अडियोमा सुनिन्छ ।