प्रोस्टेटको शल्यक्रियापछि अध्यक्षको स्वास्थ्य अवस्था सामान्य स् नर्भिक अस्पताल

राजधानीको थापाथलीमा रहेको नर्भिक इन्टरनेशनल हस्पिटलका संस्थापक अध्यक्ष तथा संरक्षक वसन्तकुमार चौधरीको प्रोस्टेटको सफल शल्यक्रिया भएको छ । अस्पतालका यूरोसर्जन डा। भरत भण्डारी नेतृत्वको यूरोलोजी टोलीले आज बिहान उनको प्रोस्टेटको सफल शल्यक्रिया गरेको बताइएको छ । 

टोलीलाई डा। सुरेश लामिछाने नेतृत्वको एनेस्थेसिया र नर्सिङ स्टाफ टिमले सहयोग गरेको थियो । ६४ वर्षीय चौधरीको दुई वर्षअघि पनि प्रोस्टेटको शल्यक्रिया गरिएको अस्पतालले जनाएको छ । उक्त समस्या पुनः बल्झिएपछि आज बिहान शल्यक्रिया गरिएको हो । चौधरी अस्पतालमै स्वास्थ्यलाभ गरिरहेका छन् ।

किन गरिन्छ प्रोस्टेट शल्यक्रिया ?

प्रोस्टेट ट्रान्सयुरेथ्रल रिसेक्शन एक सर्जिकल प्रक्रिया हो, जसमा प्रोस्टेटको एउटा भाग काटिन्छ । प्रोस्टेट ग्रन्थी पुरुषको पिसाब थैलीमुनि हुन्छ । प्रोस्टेट ग्रन्थी बढेपछि पिसाबको बाटो अवरोध हुन्छ । यसको प्रभावकारी उपचार शल्यक्रिया नै भएको चिकित्सकहरु बताउँछन् । 

एक पटक प्रोस्टेटको उपचार गरिसकेपछि पनि कतिपयको नली खुम्चिने, पूरा नकाटिने वा पुनः बढ्ने अवस्था बन्ने गरेको छ । सोही कारण एक पटक प्रोस्टेटको शल्यक्रिया गरिसकेकालाई पुनः पनि उही समस्याले सताउँछ । ४५ वर्ष नाघेका पुरुषहरुले प्रोस्टेट ग्रन्थीको समय–समयमा परीक्षण गराइरहनुपर्ने चिकित्सकहरुको भनाइ छ ।