एकातिर भुटानी शरणार्थी र सुन तस्करी प्रकरण,अर्कोतिर सिआइबी चिफसँग अमेरिकी उच्च अधिकारीको भेट

प्रहरीको केन्द्रीय अनुसन्धान ब्युरोका प्रमुख तथा अतिरिक्त महानिरीक्षक किरण बज्राचार्यसँग अमेरिकी उच्च अधिकारीले भेट गरेका छन् । बज्राचार्यसँग भेट गर्न अमेरिकी अधिकारीहरु आज बिहान महाराजगञ्जस्थित सिआइबी कार्यालय पुगेका हुन् । 

बिहान ९ बजेदेखि झण्डै एक घण्टा भएको कुराकानीमा अमेरिकी विदेश मन्त्रालयका रिचर्ड नेफ्युसहित तीन जना अधिकारी सहभागी थिए । रिचर्ड विदेश मन्त्रालयअन्तर्गत विश्वव्यापी भ्रष्टाचारविरोधी इकाइका संयोजक हुन् । अमेरिकी अधिकारी रिचर्ड हिजो काठमाडौं आइपुगेको नेपालका लागि अमेरिकी राजदूत डिन आर थम्पसनले सामाजिक सञ्जालमार्फत जानकारी दिनुभएको थियो ।

यता,सिआइबी पछिल्लो पटक एक क्विन्टल सुन प्रकरण,बालुवाटारको ललिता निवास काण्डको अनुसन्धान र छानबिनमा सक्रिय छ । सोही क्रममा भएको आजको भेटघाटलाई अर्थपूर्ण मानिएको छ ।