चीन भ्रमणमा कर्णालीका सडकलाई प्राथमिकतामा राख्ने प्रधानमन्त्रीकाे प्रतिवद्धता

प्रधानमन्त्री पुष्पकमल दाहाल (प्रचण्ड) ले आगामी चीन भ्रमणमा चीनको सीमादेखि कर्णालीलाई जोड्ने विभिन्न सडकलाई प्राथमिकतामा राख्ने बताउनुभएको छ ।

उहाँले कर्णाली कोरिडोर, कर्णाली राजमार्ग, भेरी कोरिडोरलगायत सडकलाई प्राथमिकतामा राखेर चीन भ्रमण गर्न लागेको उल्लेख गर्नुभएको छ ।

सुर्खेतमा आयोजित कर्णाली प्रदेश स्थापना दिवस समारोहमा बोल्दै प्रधानमन्त्री दाहालले हिल्सा–सुर्खेत सडक चालु आर्थिक वर्षभित्रै सम्पन्न हुने विश्वास व्यक्त गर्नुभएको छ । 

जनयुद्धको नेतृत्व कर्णालीमै बसेर गरेको आफूलाई ताजा स्मरण भएको बताउँदै उल्लेख गर्नुभयो, ‘कर्णाली, सुदूर पश्चिम र मधेश प्रदेशको समुन्नत विकास नगरी देशको समृद्धि हुँदैन ।’

प्रधानमन्त्री दाहाल आजै बिहान काठमाडौंबाट सुर्खेत पुग्नुभएको हो । उहाँ १४ सदस्यीय टोलीका साथ बिहान पौने १० बजे बुद्ध एअरको उडानमा काठमाडौंबाट प्रस्थान गर्नुभएको थियो ।

टोलीमा राष्ट्रिय अनुसन्धान विभागका प्रमुख अनुसन्धान अधिकृत हेमन्त कार्की, सशस्त्र प्रहरी निरीक्षक मनोज थापा, पूर्वमन्त्री प्रेमबहादुर सिंह, सांसद छिरिङ लामा छन् । त्यसैगरी प्रधानमन्त्रीको निजी सचिवालयका कर्मचारी र सुरक्षाकर्मी पनि छन् । 

जसमा छोरी तथा निजी सचिव गंगा दाहाल, रमेश मल्ल, अर्जुन भण्डारी, ज्ञानु खड्का, निरज भण्डारी, सिद्धराज न्यौपाने, निरञ्जन धामी, कुमार श्रेष्ठ, कृष्ण खत्री, प्रदीपराज वन्त र नवराज दाहाल छन् ।