पार्वतीका जँड्याहा भदाहरुद्वारा अस्पतालमै प्रलय

जिल्ला अस्पताल बैतडीको अस्पताल विकास समितिकी अध्यक्ष एवं एमाले नेतृ पार्वती भट्टका नातेदारहरुले मादक पदार्थ सेवन गरेर अस्पतालभित्रै रडाको मच्चाएको खुलेको छ । मेलौली नगरपालिका–२, सलेनानिवासी भदाहाहरु कपिल र पारसले मदिरा पिएर हंगामा गरेका हुन् । 

नशामा लठ्ठिएका उनीहरुले बबाल मच्चाएपछि प्रहरी बोलाउनुपरेको थियो । उनीहरुले रक्सी खाएर अस्पतालमा होहल्ला गरेको भिडियो फेला परेको छ, जसमा एक जना  वरिष्ठ सईले तिनलाई सम्झाइरहेको देखिन्छ । तीमध्ये एक जनाले तीन क्वार्टर पिएको स्वीकारेका छन् । झुम्म भएका पारस भन्छन्, ‘मैले तीन क्वार्टर खुकुरी रम खाएको छु । १८ सय रुपैयाँ खर्च गरेको छु ।’

झण्डै चार–पाँच दिनअघि राति साढे ९ बजे अस्पतालको पहिलो तल्लामा भएको घटना हो यो । अध्यक्ष भट्ट त्यतिबेला बाहिर गएकी थिइन् । आफ्नो निवासको चाबी माग्दै आएका भदाहाहरुले रक्सी खाएर बवण्डर मच्चाएको एक जना सुरक्षाकर्मीको भनाइ छ । 

उनले भने, ‘अध्यक्षले भदाहालाई तेस्रो तल्लास्थित आफ्नो निवासको चाबी दिएकी रहिछन् । उनीहरुले मादक पदार्थ ल्याएका रहेछन् । अध्यक्ष नभएपछि अस्पतालको पहिलो तल्लामै बसेर पिएछन् । त्यसपछि त बवण्डर मच्चाइहाले । प्रहरी नै बोलाउनुपरेको थियो । तेस्रो तल्लामा क्वार्टर छ, दुई तल्लामा अस्पताल छ । ठूलै लफडा भयो ।’

उनीहरुले बिरामीका कुरुवाहरुसँग लफडा गरे पनि कुनै कारबाही भएको छैन । जिल्ला प्रहरी कार्यालयले उनीहरुलाई त्यत्तिकै छोडेपछि अस्पतालका कर्मचारीहरुले असन्तुष्टि पोखेका छन् । 

एक कर्मचारीले आक्रोश पोख्दै भने, ‘जिल्ला अस्पताल कसैको निजी संस्था हो र जो जतिखेर आएर जे पनि गर्न सक्ने ? अध्यक्षले आफ्नो नातेदारलाई बोलाई रक्सी खुवाएर मोज गराउने ठाउँ हो यो ? अस्पतालजस्तो संवेदनशील ठाउँमा रक्सी खाएर हो–हल्ला गर्नेमाथि कारबाही हुनुपर्दैन ? जिल्ला प्रशासन कार्यालय र जिल्ला प्रहरी कार्यालय के हेरेर बसेको !’

उनीहरुलाई नसमात्न भनेर एमालेका नेताबाटै दबाब आएको स्रोत बताउँछ । यता, बैतडीका प्रहरी नायव उपरीक्षक (डिएसपी) दीपक गिरीले उनीहरुले अस्पताललाई क्षति पु¥याउने कार्य नगरेकाले कारबाही नगरिएको बताए । उनीहरुले अस्पतालमा नभई क्वार्टरमा रक्सी खाएको डिएसपी गिरीको दाबी छ । 

हाल सो विषयमा मिलापत्रसमेत गरिसकेको उनले बताए । उनको बुझाइमा यो सामान्य कुरा हो । भन्छन्, ‘हो, उनीहरुले मादक पदार्थ सेवन गरेका हुन् । तर, अस्पताललाई क्षति पु¥याएका छैनन् । क्वार्टरमा रक्सी खाएका रहेछन् । अध्यक्ष हुनुहुन्नथ्यो । सामान्य वादविवाद भएपछि प्रहरी त्यहाँ गएको हो । कुनै हंगामा भएको छैन । त्यो घटनाविरुद्ध उजुरी पनि परेको छैन । एउटा बेनामे निवेदन परेको थियो । वडाका प्रतिनिधि राखेर मेलमिलाप गरिसकेका  छौं ।’

अस्पतालभित्र मादक पदार्थ लिएर जानु, सेवन गरेपछि हंगामा गर्नु र प्रहरी बोलाइनुलाई डिएसपी गिरीले सामान्य रुपमा चित्रण गर्नु आश्चर्यजनक छ । संवेदनशील स्थानको शान्ति भंग पार्ने उक्त घटनालाई ढाकछोप गर्न प्रहरी नै लागेको अस्पतालका कर्मचारीहरुको आरोप छ । भदाहाहरुले गरेको हर्कतका कारण विवादमा तानिएकी अध्यक्ष भट्टले आफ्नो कारणले अस्पताल दुई पटक उत्कृष्ट ठहरिसकेको बताइन् । हाल उनी सामाजिक सञ्जालमा लेखेको स्टाटसका कारण पनि चर्चामा छिन् । उनले दुई दिनअघि छोरी–बहिनी बलात्कार गर्ने हाकिम चाहिँदैन भन्दै सनसनीपूर्ण स्टाटस लेखेकी थिइन् । 

उक्त स्टाटस सामाजिक सञ्जालमा भाइरल बनेको छ । लेखेकी छिन्, ‘हाकिमको पनि हाकिम हुँ भन्ने, पाँच–पाँच वर्षसम्म एउटै कार्यालयमा बसिरहने जबकी नियमानुसार दुई–दुई वर्षमा सबै कार्यालय प्रमुखहरुको सरुवा हुन्छ, तर छोरी–बहिनीलाई बलात्कार गर्ने हाकिम अब चाहिँदैन । अत्ति भयो, अब म सहनेवाला छैन, कानुनी प्रक्रियामा जान्छु ।’

उनको स्टाटसमा आएका कमेण्टहरुमा उनैमाथि प्रश्न गर्ने धेरै छन् । एक जना सामाजिक सञ्जाल प्रयोगकर्ताले लेखेका छन्, ‘तपाईंजत्तिको मान्छेले यतिसम्मको कुरा गर्नुभयो, साँचो हो भने तत्काल सार्वजनिक गरियोस् हैन भने तपाईंमाथि प्रश्न उठ्यो ।’

त्यस्तै, अर्कोले भनेका छन्,‘यस्तो हाकिम को हो ? नाम खुलाउनुप¥यो पार्वती भट्ट म्याम ! अपुष्ट कुरा राखेको सुहाएन ।’ आफूमाथि अन्याय गर्ने व्यक्तिलाई सामाजिक सञ्जालमार्फत चेतावनी दिएको अध्यक्ष भट्टले बताइन् । 

‘म एकल महिला हुँ । त्यो व्यक्ति को हो, नाम खुलाउँदिन । बुझ्नेले बुझिसक्यो । चेतावनी दिएको हुँ । अब पनि हर्कतहरु रोकिएन भने कानुनी उपचारमा जान्छु’, उनले भनिन् ।