क्रिकेट मैदानमा जाने बाटो एमाले उपाध्यक्षले बनाइदिने

नेकपा एमालेका उपाध्यक्ष विष्णुप्रसाद पौडेलले रुपन्देहीको तिलोत्तमास्थित नवनिर्मित 'एक्स्ट्राटेक ओभल मैदान'सम्म पुग्ने सडक निर्माणका लागि बजेट विनियोजन गराउन पहल गर्ने प्रतिवद्धता जनाएका छन् । 

नवनिर्मित मैदानको उद्घाटन समारोहका अवसरमा आज त्यहाँ आयोजित कार्यक्रमलाई सम्बोधन गर्दै उनले त्यस्तो प्रतिवद्धता गरेका हुन् । पूर्वअर्थमन्त्रीसमेत रहेका पौडेलले तिलोत्तमा नगरपालिकासँग मिलेर मैदानबाट हाइवेसम्म कालोपत्रे सडक निर्माण गर्न आफूले भूमिका खेल्ने बताए । 

मैदानका लागि आवश्यक पर्ने पूर्वाधार निर्माणमा आफूसहित यहाँका जनप्रतिनिधिहरुले सहकार्यमा काम गर्ने उनले विश्वाससमेत दिलाए । निजि तवरबाट निर्मित यस मैदानमा के-के चाहिएको छ भनेर आफूले बुझिसकेको र त्यसअनुसार प्रतिवद्धता गरेको पौडेलले बताए ।  

‘जनप्रतिनिधिले धेरै भाषण गर्ने, चिप्ला कुरा गर्ने राम्रो होइन । सकिन्छ भने काम गर्नु राम्रो र नसके गफ गर्नु राम्रो हुँदैन । मैले विनोद कुवँरजीलाई सोधेँ । के-के चाहिएको छ, अघि बढ्नका निम्ति । उहाँले एउटा क्वालिटीको ट्रान्सफर्मर चाहियो भन्नुभयो । मैले त्यसको जिम्मा लिन चाहन्छु । सरकारका तर्फबाट लगानी गर्न मैले अग्रसरता लिनेछु र त्यो ट्रान्सफर्मरको प्रवन्ध गर्न ध्यान दिनेछौँ । रोड एक्सिस राम्रो हुनुपर्छ भन्ने उहाँको माग छ । यहाँबाट सहजै हाइवेमा दर्शक र खेलाडी जानुपर्छ भन्ने छ । फराकिलो बाटोको सन्दर्भमा तिलोत्तमा नगरपालिकाका प्रमुख र उपप्रमुखज्युहरुसँग छलफल गरेर र सहकार्य गरी खेलमैदानसम्म आउनका लागि फराकिलो बाटो निर्माण गर्न राज्यको तर्फबाट बजेट विनियोजन गर्ने काममा लाग्नेछौँ’, उनले भने । 

गत ३० जेठमा निर्माणको शिलान्यास भएको रंगशाला आठ महिनापछि खेल्नयोग्य मैदानका रुपमा विकास भएको छ । गुल्मीका विनोद कुँवरले ४० करोड लगानीमा रंगाशाला निर्माण गरेका हुन् । आज लुम्बिनी प्रदेश प्रमुख अमिक शेरचनले रंगशाला उद्दघाटन गरे ।