विद्यार्थी लिएर रारा जाँदै गरेको जीप दुर्घटना, एक दर्जन घाइते

बाजुराबाट रारातर्फ जाँदै गरेको जिप दुर्घटना हुँदा १२ जना घाइते भएका छन् । 

बाजुराको बुढीगंगा नगरपालिका–२ स्थित जनप्रकाश माविमा अध्यनरत विद्यार्थी लिएर शैक्षिक भ्रमणमा जाँदै गर्दा ग १ ज ८२४९ नम्बरको जीप आज दिउँसो खत्याड गाउँपालिका–२, स्थित दुर्घटनामा परेको हो ।

दुर्घटनामा विद्यार्थी र शिक्षक गरी १२ जना घाइते भएको जिल्ला प्रहरी कार्यालय मुगुका इन्स्पेक्टर प्रकाशसिंह कार्कीले बताए । उनका अनुसार घाइतेको नजिककै स्वास्थ्य चौकीमा उपचार भइरहेको छ । 

सबैजना खतरामुक्त रहेको जानकारी दिँदै इन्स्पेक्टर कार्कीले जीप शैक्षिक भ्रमणका लागि रारा तालतर्फ जाँदै गरेको पनि बताए । उनले भने, ‘शैक्षिक भ्रमणको लागि रारा तालतर्फ जाँदै गर्दा जीप सडकबाट ३० किलोमिटर तल खसेको हो ।’ 

यस सम्बन्धमा थप अनुसन्धान भइरहेको प्रहरीले जानकारी दिएको छ ।