गभर्नरले राजनीतिक पक्षधरता देखाएको पूर्वमन्त्रीको आरोप

नेकमा माओवादी केन्द्रका उपमहासचिव वर्षमान पुनले नेपाल राष्ट्र बैंकका गभर्नर महाप्रसाद अधिकारीले वैचारिक निकटताका आधारमा काम गरेको बताएका छन् । मौद्रिक नीतिका सन्दर्भमा गभर्नरको वैचारिक तथा राजनीतिक पक्षधरता प्रकट भएको उनले दाबी गरे । 

अर्थ समितिको आजको बैठकमा पूर्वअर्थमन्त्रीसमेत रहेका पुनले विगतमा शेरबहादुर देउवा र पुष्पकमल दाहाल प्रचण्ड नेतृत्वको सरकारलाई गभर्नर अधिकारीले साथ नदिएको उल्लेख गरे । अहिले आफूसँग वैचारिक निकटताको प्रधानमन्त्री र अर्थमन्त्री भएकाले गभर्नरले खुकुलो मौद्रिक नीति ल्याएको उनको आरोप छ । 

गभर्नरले समर्थन गरेकै कारण यसचोटी वित्त र मौद्रिक नीतिबीच तालमेल मिलेको पुनको भनाई छ । ‘विगतमा शेरबहादुर देउवाको नेतृत्वको सरकारलाई गभर्नरले सपोर्ट गर्नुभएन । प्रचण्डको नेतृत्वको सरकारलाई पनि सपोर्ट गर्नुभएन । अहिले आफूसँग वैचारिक निकटता भएको प्रधानमन्त्री र अर्थमन्त्री आएको हुनाले उहाँले खुकुलो गर्नुभएको आफ्नो ट्रेन्डभन्दा विपरित खुकुलो नीति लिनुभयो,’ उनले भने, ‘यसले राम्रो भएको भन्ने पनि आयो । मान्छेको मुख थुन्न सकिँदैन । तर, कहीं न कहीं त्यो पनि देखिन्छ । वित्त र मौद्रिक नीतिको तालमेल यसपटक मिलेको छ ।’ 

राष्ट्र बैंकले अहिलेको सरकारलाई समर्थन गरेकै कारण सेयर बजार बढेको उल्लेख गर्दै पूर्वअर्थमन्त्री पुनले पहिले नै सुधारका नीति लिनुपर्नेमा त्यसो हुन नसकेको गुनासो गरे । धितोपत्र बोर्डको अध्यक्ष नियुक्तिमा चलखेल भएको संकेत गर्दै उनले पूर्वअर्थमन्त्री डा. प्रकाशशरण महत र आफ्नो कार्यकालमा यो विषय जटिल बनेको बताए । 
‘धितोपत्र बोर्डको अध्यक्षमा व्यवसायिक मान्छे ल्याउनुपर्छ भनेर मैले पनि धेरै कोशिस गरेँ । यसमा धेरै कर्पोरेट हाउसको चासो रह्यो । तर बोर्ड अध्यक्षमा स्वच्छ र व्यावसायिक मान्छे ल्याउन आवश्यक छ’, पुनले भने ।