अर्काको व्यक्तिगत विवरण दुरुपयोग गरेकालाई १० करोड ऋण

मोरङको विराटनगरस्थित लक्ष्मी सनराइज बैंकका एक ग्राहकले अर्का ग्राहकको व्यक्तिगत विवरण दुरुपयोग गरेर करोडौं रुपैयाँ ऋण लिने प्रकिया अगाडि बढाएको तथ्य खुलेको छ । अर्काको व्यक्तिगत विवरण दुरुपयोग गरेर करोडौंमध्ये यसअघि पौने लाख निकालिसकेका ती व्यक्तिले थप ऋणको प्रक्रिया अगाडि बढाएपछि वास्तविकता बाहिर आएको बताइन्छ । 

बेलबारी नगरपालिका–३ का प्रताप थापाले गाडी किन्न राखेको एकाघरका सदस्य छोराको व्यक्तिगत ग्यारेन्टीको सम्पत्ति विवरणको दुरुपयोग गरेर अर्कै व्यक्तिले लाखौं रुपैयाँ ऋण निकालेका हुन् । उनले १० करोड रुपैयाँ ऋण निकाल्ने प्रक्रिया अगाडि बढाउने क्रममा केही झिकेको बताइन्छ । प्रतापका अनुसार सन् २०१५ मा गाडी किन्न ऋण लिँदा उनले छोरा प्रभाषलाई व्यक्तिगत ग्यारेन्टी राखेका थिए । 

ऋण चुक्ता गरिसकेकाले सो गाडी उनको नाममा आइसकेको छ । तर, गाडी किन्न ऋण लिँदा बैंक ग्यारेन्टी राखेको सम्पत्ति विवरणको कागजात दुरुपयोग गरेर रामेश्वर सेढाईले सो बैंकबाट ऋण निकाल्ने गरेको पाइएको छ । रामेश्वरले बैंकको वीरगञ्ज शाखाबाट २०७७ जेठ १४ गते ४८ हजार ८६७, जेठ १७ गते २६ लाख ७६ हजार ९६२ रुपैयाँ ऋण लिइसकेका छन् ।  

बैंकसँग मिलेमतो गरेर उनले ऋण लिएको प्रभाषको आरोप छ । ‘बैंकसँग मिलेमतो गरेर रामेश्वरले गत साउन २१ गते १० करोड ‘टर्मलोन’ का लागि आफूलाई पुनः व्यक्तिगत ग्यारेन्टी राखेर प्रक्रिया बढाएको पाइएको छ’, उनले भने । 

एउटाले बैंक ग्यारेन्टी राखेको कागजात अर्कोले प्रयोग गरेर पटकपटक ऋण निकाल्नुलाई स्वाभाविक रुपमा लिन नसकिने उनी बताउँछन् । पहिले लाखौं रुपैयाँ ऋण लिइसकेको व्यक्तिले पुनः १० करोड रुपैयाँ ऋण लिन लागेकोमा कर्मचारीको पनि मिलेमतो देखिएको प्रभाषको भनाइ छ । 

कर्मचारीहरुले रकम लेनदेन गरेर आफ्नो सम्पत्ति विवरणको कागजात रामेश्वरलाई उपलब्ध गराएको उनको ठम्याइ छ । प्रतापका अनुसार उनीहरुले रामेश्वरलाई देखेकै छैनन् । प्रतापको घरमा सांग्रिला विकास बैंक भाडामा बसेको छ । कारोबारका क्रममा बैंकले काठमाडौंको कमलादीस्थित कर्जा सूचना केन्द्रबाट केही समयअघि मगाएको ‘सीआईसी’ रिपोर्टमा रामेश्वरले यसअघि दुई पटक ऋण लिइसकेको र फेरि ऋण लिने प्रक्रियामा रहेको खुलेको छ । दुईपटक ऋण लिँदा रामेश्वरले प्रभाषलाई नै व्यक्तिगत ग्यारेन्टी राखेका छन् । 

छानबिनमा बैंकको आनाकानी

आफ्नो व्यक्तिगत सम्पत्ति विवरण दुरुपयोग भएपछि प्रतापले बैंकलाई जानकारी गराएका छन् । तर, बैंकले छानबिनमा चासो नदेखाएको भन्दै उनले दुःखेसो पोखे । उनका अनुसार बैंकले ‘हामी सुधार गरिदिन्छौं’ भनेर आलटाल गरेको छ । विराटनगरस्थित बैंकका म्यानेजर सुदीप रायमाझीले आफूहरुबाट गल्ती भएको स्वीकार गरेको बाबुछोराको भनाइ छ । 

बैंकले कर्जा सूचना केन्द्रमा पत्राचार गरेर ‘सीआईसी’ रिपोर्टमा बाँकी रहेका सबै कर्जा हटाउन लगाएपनि हटेको छैन् । प्रतापले विराटनगर शाखाबाट ग्राहक बनेपनि कुनै कारोबार नगरेको बताए । बैंकको नियमानुसार कर्जा प्रवाह गर्दा एकाघरको अंश लाग्ने सदस्यहरुले मात्र व्यक्तिगत ग्यारेण्टी राख्न मिल्ने प्रावधान छ । तर, अपरिचित रामेश्वरले चिन्दै नचिनेको व्यक्तिको सम्पत्ति विवरण प्रयोग गरेर कसरी ऋण लिए ? भन्ने गम्भीर प्रश्न उठेको छ । 

यता, बैंकका म्यानेजर रायमाझीले कारोबारका क्रममा कहिलेकाँही गल्ती हुने सहजै बताए । त्यसबारे आन्तरिक अनुसन्धान थालिएको पनि उनले जानकारी दिए ।