लुम्बिनी विकास कोषका सदस्यसचिवमाथि आक्रमण, सुरक्षाबारे सिडिओ कार्यालयमा छलफल

लुम्बिनी विकास कोषका सदस्य सचिव सानुराजा शाक्य निर्माण व्यवसायीहरुको कुटपिटबाट घाइते भएका छन् । रुपन्देहीको एक होटलमा आयोजित एक कार्यक्रममा सहभागी शाक्यलाई दर्जनभन्दा बढी निर्माण व्यवयासीहरुले निर्घात कुटपिट गरेको बताइएको छ ।

कोषका पदाधिकारीहरु सुरक्षाको माग गर्दै जिल्ला प्रशासन कार्यालय रुपन्देही पुगेका छन् । सुरक्षा व्यवस्था उपलब्ध गराउनेबारे छलफल चलिरहेको सहायक प्रमुख जिल्ला अधिकारी चिरञ्जिवी रानाले जानकारी दिए । उनले जनआस्थासँग भने, ‘कोषका चार पाँच जना पदाधिकारी आउनुभएको छ, सिडिओसापसँग छलफल चलिरहेको छ ।’ 

सम्पन्न भइसकेका विविन्न आयोजनाको भुक्तानी रोकेको भन्दै उनीहरुले आक्रमण गरेका हुन् । घटनाबारे थप अनुसन्धान गर्न अहिले प्रहरी परिचालन गरिएको जिल्ला प्रशासन कार्यालयले जनाएको छ ।