प्रसाईंको 'किर्ते प्रमाण' र राजनको कम्बोडिया प्रस्थानले निम्तिएको संशय

आफूलाई व्यवस्थाविरोधी अभियन्ता बताउने विवादास्पद व्यवसायी दुर्गा प्रसाईँले केही दिनअघि कम्बोडियाको टेलिकममा प्रधानमन्त्री केपी शर्मा ओलीको अर्बौंको लगानी रहेको दाबी गर्दै केही कागजात सार्वजनिक गरे । त्यहाँको स्मार्ट एजियाटा कम्पनीमा ओलीले ३२ अर्ब लगानी गरेको बताउँदै उनले भिडियोमार्फत 'डिजिटल डकुमेन्ट' बाहिर ल्याएका थिए । 
 

प्रधानमन्त्रीविरुद्ध भ्रम फिँजाएको आरोपमा पक्राउ परेका प्रसाईले भाइरल बनाएका डकुमेन्टमा कुनै सत्यता नरहेको प्रहरीको केन्द्रीय अनुसन्धान ब्युरो (सिआइबी)ले जनाइसकेको छ । एसपी होविन्द्र बोगटी भन्छन्, ‘ती सबै डकुमेन्ट फेक हुन्, यो कार्यमा संलग्न अरुलाई पनि खोज्दैछौँ ।’

प्रहरीका अनुसार प्रसाईँमाथि विद्युतीय कारोबार, किर्ते कागजात र मानहानीको मुद्धामा अनुसन्धान भैरहेको छ । त्यसपछि अदालतबाटै यसको अन्तिम निर्क्याैल हुनेछ । यद्यपि, कतिपयले भने प्रसाईँले लगाएको आरोपमाथि पनि अनुसन्धान हुनुपर्ने तर्क गरिरहेका छन् । 

प्रसाईँकै कारण नेपालमा कम्बोडियाको चर्चा भइरहेको बेला एमालेका नेताहरु त्यतै उडेका छन् । विदेश विभाग प्रमुख रघुवीर महासेठ, बागमती प्रदेश इञ्चार्ज डा. राजन भट्टराईसहितका नेताहरु हिजो साँझ कम्बोडिया प्रस्थान गरेका हुन् । 

‘बाघ कराउनू र बाख्रा हराउनू’ भनेझैँ झै पार्टी अध्यक्ष तथा प्रधानमन्त्री ओलीमाथि कम्बोडियामा अर्बौं सम्पत्ति थुपारेको आरोप लागिरहँदा ओलीका विश्वासपात्र मानिएका महासेठ र भट्टराई त्यतै जानूलाई कतिपयले शंकाको नजरले हेरेको पाइन्छ । 

एमालेले भोली काठमाडौँमा 'जागरण सभा' गर्दैछ । काठमाडौँ, भक्तपुर र ललितपुर जिल्ला कमिटी संयुक्त आयोजक रहेको जागरण सभालाई प्रभावकारी बनाउन गठित संयोजन समितिको संयोजक हुन्, भट्टराई । दुई दिनअघि च्यासलस्थित पार्टी कार्यालयमा बसेको बैठकमा उनले जागरण सभाको उद्धेश्यबारे प्रकाश पार्दै एक लाख कार्यकर्ता सडकमा ओराल्ने घोषणा गरेका थिए । 

सरकारमा बसेर सडक संघर्षको उल्टो बाटो समातेको एमालेले निकै महत्व दिएको जागरण सभाको संघारमा सम्पूर्ण जिम्मेवारी कैलाश ढुंगेललाई दिएर कम्बोडिया उड्नुपर्ने बाध्यता भट्टराईलाई किन आइलाग्यो ? प्रश्न उठिरहँदा उनले पार्टी स्थायी कमिटी सदस्यको हैसियतमा आइक्यापको १२औँ अधिवेशनमा सहभागी हुन कम्बोडिया गएको जानकारी दिएका छन् । तर, नागरिकमा पैदा भएको संशय भने मेटिएको छैन । 

सामाजिक सञ्जालमा प्रभात भट्टले सोधेका छन्, ‘३२ अर्ब रिटोटलिङ गर्न जानु भको हो र ?’ अरुण चाम्लिङले पनि भट्टराईको अनपेक्षित भ्रमणप्रति शंका गरेका छन् । भन्छन्, ‘त्यो अर्बौको चिर्कटो मिलाउन जानुभएको होला, शुभयात्रा ।’

इश्वर भण्डारीले भने सम्भावित दुई परिदृश्यबारे विश्लेषण गरेका छन् । ‘जागरण सभाको पूर्वसन्ध्यामा संयोजक नै कार्यक्रम छोडेर कम्बोडिया कुद्नुले प्रसाईँको पल्ला भारी भएन र ?’, उनकाे प्रतिक्रिया छ, ‘जानैपर्ने कार्यक्रम हो भने अरु स्थायी कमिटी सदस्यलाई पठाउन सकिन्थ्यो । कि तपाईं भ्रमण र अवसरको लोभी हो, कि अब प्रसाईँले लगाएको आरोपमाथि पनि छानविन गर्नुपर्छ ।’