आर्थिक सुधारको उपाय खोज्ने जिम्मा पाँच जनालाई, शेयर तथा ऋण लगानी नीति स्वीकृत

मुलुकको समग्र अर्थतन्त्र सुधारका गर्ने उद्धेश्यले आर्थिक सुधार सुझाव आयोग गठन गरिएको छ । सरकारले पूर्वअर्थसचिव रामेश्वरप्रसाद खनालको संयोजकत्वमा ५ सदस्यीय आयोग गठन गरेको हो । 

हिजोको क्याविनेट बैठकको निर्णयमुताबिक गठित समितिलाई अर्थतन्त्र सुधारका लागि अध्ययन गरी रायसहितको प्रतिवेदन पेश गर्ने कार्यादेश दिइएको छ । 

त्यस्तै, थप ५७ वटा नयाँ हिमाल आरोहणका लागि खुला गर्ने निर्णय पनि क्याविनेट बैठकले गरेको छ । सरकारका प्रवक्ता पृथ्वीसुब्बा गुरुङले संस्कृति, पर्यटन तथा नागरिक उड्डयन मन्त्रालयअन्तर्गत रहेका थप हिमालहरुको आरोहणका लागि अनुमति दिने निर्णय भएको बताउनुभयो  । 

क्याविनेटले आगामी कात्तिक १९ देखि २३ गतेसम्म इजिप्टको कायरोमा आयोजना हुने 'वल्र्ड अरबान फोरम' मा सहभागी हुन उपप्रधान तथा शहरी विकासमन्त्री प्रकाशमान सिंहलाई अनुमति दिएको छ । कात्तिक १ देखि ३ गतेसम्म रशियामा आयोजना हुने २२ औं 'इन्टरनेशनल स्पोर्ट्स फोरम'मा युवा तथा खेलकुदमन्त्री तजुलाल चौधरीलाई पठाउने प्रस्ताव पनि स्वीकृत भएको छ ।

त्यसैगरी, शेयर तथा ऋण लगानी नीति २०८१ क्याविनेट बैठकले स्वीकृत गरेको मन्त्री गुरुङले जानकारी दिनुभयो ।