पूर्वराजाको सुविधा खोसेपछि राहदानी रद्द, धवल शमशेरको पक्राउबारे संसदलाई पत्र

राजावादीहरुको आन्दोलन भड्काएको आरोप लागेपछि पूर्वराजा ज्ञानेन्द्र शाहलाई राज्यले दिँदै आएको सुरक्षालगायत सुविधा खोस्ने भएको छ । हिजो तीनकुने, कोटेश्वर क्षेत्रमा भएको आगजनी, तोडफोड र लुटपाटमा दुई जनाको ज्यान गएको छ भने ठूलो भौतिक क्षति भएको छ । 

अस्ति बेलुकी निर्मल निवासमा बोलाएर दुर्गा प्रसाईंलाई आन्दोलनको कमाण्डर तोकिएको, नवराज सुवेदीलाई यसअघि नै संयुक्त जनआन्दोलनको संयोजक उनै शाहले तोकिदिएका थिए । यो घटनाक्रमले पूर्वराजाकै निर्देशनमा आन्दोलन भएको देखिएकाले गएराति बसेको क्याबिनेट बैठकमा राहदानी रद्द र सुविधा खोस्ने सम्बन्धमा छलफल भएको हो ।  

क्याबिनेटमा त्यसबारे छलफल भएपछि प्रहरीले आवश्यक प्रमाण संकलन थालेको हो । आन्दोलनका कमाण्डर भनिएका दुर्गा प्रसाईंले सुरक्षाकर्मीमाथि गाडी चलाएर आक्रमणको प्रयास गरेका थिए । 

हिरासतमा रहेका राप्रपा सांसद धवल शमशेर राणाको पक्राउबारे प्रहरीले संसद सचिवालयलाई जानकारी गराएको छ । सांसद पक्राउ परेपछि सभामुख मार्फत् संसदलाई जानकारी गराउनुपर्ने भएकाले भोलिको बैठकमा त्यसबारे अवगत गराइने संसद सचिवालय स्रोतले बताएको छ ।