सुकेधारा र उदयपुरमा राप्रपाको प्रतिरोध

राष्ट्रिय प्रजातन्त्र पार्टीका कार्यकर्ताले आफ्ना नेताहरु पक्राउ परेको विरोधमा प्रदर्शन गरेका छन् । हिजो राति काठमाडौंको सुकेधारा र उदयपुरमा मसाल जुलुससहित उनीहरुले विरोध प्रदर्शन गरेका हुन् । 

काठमाडौंमा राप्रपाका सहायक महामन्त्रीले नेतृत्व गरेको प्रदर्शनमा मुश्किलले एक दर्जन कार्यकर्ता थिए । मसाल जुलुस निकाल्न खोजेपछि प्रहरीले अवरोध पुर्याएको र एकछिन नारा लगाएपछि उनीहरु तितरबितर भएका हुन् ।

उता उदयपुरको त्रियुगा नगरपालिका, बाबरानीमा पनि राप्रपा कार्यकर्ताले नाराबाजी र कोणसभा गरेका छन् । हिजो साँझ झण्डै पाँच दर्जन कार्यकर्ताको नेतृत्व जिल्ला अध्यक्ष ध्रुव रायमाझीले गरेका थिए । सुरक्षाको निम्ति सशस्त्र प्रहरीको नम्बर ५ गणबाट सशस्त्र प्रहरी सहायक निरीक्षक आश नारायण साहको कमाण्डमा १५ जनाको टोली खटिएको थियो ।