सापटीको पैसा बुझाउन चैत मसान्तको सीमा

कर्मचारी सञ्चय कोषले सापटी किस्ताको रकम चुक्ता गर्न चैत मसान्तको समयसीमा तोकेको छ । 

कोषले आज सार्वजनिक सूचना निकालेर घर, जग्गा खरिद, मर्मत, शैक्षिक र सरल सापटी लिएका ऋणीलाई चालु आर्थिक वर्ष २०८१–०८२ को तेस्रो त्रैमासमा भुक्तान गर्नुपर्ने किस्ताबापतको रकम बुझाउन भनेको हो ।

 
‘कोषको सञ्चयकर्ता कर्जा विभाग, लगनखेल र कोषका विभिन्न शाखा कार्यालयबाट विभिन्न मितिमा घर सापटी, शैक्षिक सापटी, घर मर्मत सापटी, सरल सापटी र जग्गा खरिद सापटी लिएका ऋणी सञ्चयकर्ताले आव २०८१–०८२ को तेस्रो त्रैमासमा कोषलाई भुक्तानी गर्नुपर्ने किस्ताबापतको रकम मिति २०८१ चैत मसान्तभित्र बुझाउनुहुन अनुरोध छ’, सूचनामा भनिएको छ ।  

नियमित त्रैमासिक किस्ता भुक्तानी गर्ने सञ्चयकर्तालाई शून्य दशमलब २५ प्रतिशत ब्याज छुट हुने जनाउँदै कोषले सापटीको किस्ता नियमित नगरेको अवस्थामा सञ्चयकर्ता कर्जा असुली विनियम, २०७९ बमोजिम असुली प्रक्रियामा जाने चेतावनीसमेत दिएको छ ।