महानगरको टोली निर्मल निवासको गेटमै रोकिएपछि पाण्डेको प्रतिक्रिया- हामीसँग वैकल्पिक उपाय पनि छ

काठमाडौँ महानगर प्रहरी बलको टोलीलाई अन्तिम राजा ज्ञानेन्द्र शाहको घर निर्मल निवास प्रवेशमा रोक लगाइएको छ । 

शुक्रबार राजावादीहरुले गरेको आन्दोलनका क्रममा काठमाडौँको तिनकुने, कोटेश्वर, जडिबुटीलगायतका स्थानमा फोहोर गरी वातावारण प्रदुषण गरेको, सार्वजनिक सम्पत्ति तोडफोड गरेकोमा महानगरले ज्ञानेन्द्रलाई सात लाख ९३ हजार जरिवाना तोकेको । उक्त जरिवान पत्र बुझाउन बिहान निर्मल निवास पुगेको महानगर प्रहरी र कर्मचारीलाई त्यहाँ सुरक्षार्थ खटिएका सुरक्षाकर्मीले गेटबाटै फर्काएका हुन् । 

महानगर प्रहरी प्रमुख एसएसपी राजु पाण्डेले भने निर्मल निवास प्रवेशमा रोक लगाइएकोबारे आफूलाई जानकारी नभएको प्रतिक्रिया दिएका छन् । तोकिएको जरिवाना रकम नतिरे वैकल्पिक उपाय अपनाउने पनि उनले बताए । 

हिजो शनिबार भएकाले आज कार्यालय समयमा पत्र लिएर टोली गएको, तर त्यहाँको अवस्थाबारे थाहा नभएको उनको भनाई छ । ‘दश बजेतिर एउटा टोली पठाएका छौँ, गेटमा छेकेको भन्ने त्यस्तो कुनै जानकारीमा आएको छैन’, उनले जनआस्थासँग भने, ‘मुख्य कुरा जरिवाना हो, जरिवाना त तिर्नुपर्छ,  तिर्दैनाैँ भन्ने अडान हाे भने हामीलाई अर्को उपाय पनि थाहा छ ।’

यसैबीच, गृह मन्त्रालयले निर्मल निवासको सुरक्षा कमाण्ड परिवर्तन गरेपछि पूर्वराजाको भेटघाटमा प्रतिबन्ध लगाएको बुझिएको छ । अस्तिसम्म त्यहाँ डिएसी जगदीश चन्द्र हमालको नेतृत्वमा २८ जना सुरक्षाकर्मी परिचालन गरिएकोमा हिजोबाट डिएसपी प्रमोद प्रकाश पाठक नेतृत्वको टोली खटाइएको हो ।