दुर्गा प्रसाईंलाई सघाउनेलाई छुटाउन अदालतको शरण

काठमाडौंको तीनकुनेमा अस्ति भएको हिंसात्मक घटनामा संलग्न रहेको आरोपमा समातिएका राजावादी नेता एवं संयुक्त जनआन्दोलन समितिका प्रवक्ता स्वागत नेपाललाई थुनामुक्त गर्न माग गर्दै सर्वोच्च अदालतमा बन्दी प्रत्यक्षीकरणको रिट परेको छ । 

सर्वोच्चका सहरजिष्ट्रार अच्युत कुईकेलका अनुसार उक्त रिट दर्ता भने भइसकेको छैन । अहिले अध्ययनको क्रममा रहेको उनको भनाइ छ । 

कुईकेलले भने, ‘नेपाललाई थुनामुक्त गर्न माग गर्दै बन्दी प्रत्यक्षीकरणको रिट निवेदन आएको छ । तर, अहिले दर्ता भइसकेको छैन । अध्ययन भइरहेको छ । अध्ययनपछि दर्ता गर्ने कि नगर्ने ? सोहीअनुरुप अघि बढ्नेछ ।’

राजावादीहरुले अस्ति तीनकुने, कोटेश्वर र सिनामंगल क्षेत्रमा आगजनी, तोडफोड र लुटपाट गरेका थिए । उक्त घटनामा संलग्न रहेको आरोपमा नेपालसहित राप्रपा नेता रविन्द्र मिश्र, धवल शमशेर, धर्मगुरु पुष्कर खतिवडा, ‘रोयल टास्क फोर्स (आरटीएफ)’ समूहका मुनिन्द्र राजभण्डारीलगायत एक सय बढी हाल प्रहरी नियन्त्रणमा छन् । 

आन्दोलनका नेतृत्वकर्ता एवं कमाण्डर भनिएका तर भिडलाई उकासेर फिल्डबाटै भागेका मेडिकल माफिया दुर्गा प्रसाईं भने अहिलेसम्म फेला परेका छैनन् ।