संसदमा चर्काचर्की, सभामुख हेरेको हेर्यै

प्रतिनिधिसभा बैठकमा आज सत्ता र प्रतिपक्षीबीच चर्काचर्की परेको छ । दुई निहत्था नागरिकको ज्यान जानेगरी भएको तीनकुने घटनामा राजावादीलाई जेल हाल्नुपर्ने माग उठेपछि सांसदहरू भनाभनमा उत्रिएका हुन् । 

कुलमान प्रकरणमा प्रधानमन्त्रीको जवाफ माग गर्दै केही दिनदेखि सदन अवरुद्ध पार्दै आएका विपक्षी सांसदले आज पनि सभा शुरु हुने बितिक्कै उठेर विरोध गरेका थिए । अर्कोतिर सत्ता पक्ष कांग्रेस र एमालेका संसद भने बैठक संचालन गर्न माग गर्दै प्रतिवादमा उत्रिए । 

सोहीक्रममा राजावादीहरुलाई समातेर जेल हाल्नुपर्ने माग सत्ता पक्षबाट उठ्यो । त्यसपछि रिसले चुर हुँदै राप्रपाका सांसदहरु टेवल ठोक्न थाले । सो पार्टीका अध्यक्ष राजेन्द्र लिङ्देनले जेल हाल चुनौती दिए । उनले छाती ठोक्दै ‘राजावादी यहाँ छ, सके जेल हाल’ भनेका थिए । 

त्यसपछि सत्ता पक्षका सांसदहरुले बोल्नको लागि सभामुख घिमिरेसँग समय मागे, तर पाएनन् । प्रमुख प्रतिपक्षी माओवादी केन्द्रले भने कुलमानको विषयमा जवाफ दिनबाट प्रधानमन्त्री पन्छिएको र सत्ताले लोकतान्त्रिक मूल्य मान्यताको गम्भीर उल्लंघन गरेको भन्दै आपत्ति जनाएको छ । 

एकैचोटी त्रिपक्षीय मागसहित सांसदहरुले टेबल ठोकेर अवरोध गरेपछि सभामुख घिमिरेले दोस्रो पटक बैठक स्थगित गरे । त्यसअघि पनि १५ मिनेटको लागि बैठक रोकिएको थियो ।