मन्त्री र सचिव विदेश गएको गयै

ओली क्याबिनेटका सबै मन्त्री दीपक खड्का, दामोदर भण्डारीझैँ व्यापारी र बिचौलिया पोस्ने मात्र छैनन्, देश र जनतालाई शिरमा राखेर काम गर्नेहरू पनि छन्। २२ मध्ये अधिकांशले विदेश यात्रा गरिसकेका छन्। कतिपय त यस्ता पनि छन्, जो बाहिरै धेरै भेटिन्छन्। एक यस्ता ‘अपवाद’ छन्, जसलाई विदेश भ्रमणप्रति मोह छैन ।

उनले आठ महिनाको अवधिमा एक पटक पनि विदेश टेकेका छैनन्, अवसर नपाएर होइन, आधा दर्जन बढी वैदेशिक भ्रमणको अवसरलाई इन्कार गर्ने ती हुन्, सञ्चार तथा सूचना प्रविधिमन्त्री पृथ्वीसुब्बा गुरुङ । यो बीचमा इन्टरनेशनल टेलिकम्युनिकेशन युनियन (आइटियु), विश्व हुलाक संघ (युपियु), एशिया प्यासिफिक टेलिकम्युनिटीका अलावा गत महिना स्पेनको बार्सिलोनामा सम्पन्न मोबाइल वल्र्ड कंग्रेसलगायत आधा दर्जन बढी वैदेशिक भ्रमणको अवसर आएका थिए, उनकै नाममा । तर पन्छिँदै आए । जस्तोः गत फागुन १९ देखि २२ गतेसम्म सम्पन्न एउटा वैदेशिक भ्रमणमा जान इन्कार गरे।

र, नेपालको प्रतिनिधित्व गर्दै सचिव राधिका अर्याल गइन्। स्पेनबाट फर्केको हप्ता दिन नबित्दै अर्याल फेरि अमेरिका जाने कार्यक्रम थियो। वासिङ्गटन डिसीमा ग्लोबल डिजिटल समिट २०२५ भ्याउने गरी टिप्पणी उठेर निर्णय समेत भइसकेको थियो। वल्र्ड बैंकले आमन्त्रण गरेको सो कार्यक्रम मार्च १७ देखि २० ( चैत्र ४(७)सम्म चलेको थियो तर उक्त भ्रमण रद्द हुन पुग्यो। गुरुङ आगामी महिना जापानमा आयोजना हुने एउटा कार्यक्रममा भने जान सक्नेछन्, हरेक पाँच वर्षमा आयोजना हुने उक्त कार्यक्रममा जानका लागि उनले ‘ग्रिन सिग्नल’ दिएको सञ्चारका अधिकारीहरूले जनाएका छन्।

यसबीच, कुलमान घिसिङलाई जिम्मेवारीबाट हटाउने विवादास्पद निर्णय गरेकै दिन सोमबारको क्याबिनेट बैठकले प्रधानमन्त्री केपी शर्मा ओलीको नेतृत्वमा परराष्ट्रमन्त्री आरजु राणासहितको टोली चैत १९ देखि २३ गतेसम्म थाइल्याण्डको राजधानी बैंककमा आयोजना हुने बिमस्टेक बैठकमा भाग लिन जाने गरी भ्रमण स्वीकृत गरेको छ । फागुन २६ को क्याबिनेटले ४ वटा, २१ गते ४ वटा, १२ गते बसेको बैठकले १५ वटा निर्णय गरेकामा ७ वटा विदेश भ्रमण स्वीकृतसम्बन्धी रहेको सञ्चार मन्त्रालयले जनाएको छ । यस्तै फागुन १२ मा बैठकले विभिन्न ४ सचिवको भ्रमण स्वीकृत गरेको छ भने ६ फागुनको बैंठकले २ भ्रमणलाई स्वीकृति दिएको छ ।