चिकित्सकहरुलाई विदेश पलायन हुनबाट रोक्न आग्रह

चिकित्सा शिक्षा आयोगले निजी मेडिकल कलेजको प्रकाशित सिट संख्या घटाई म्याचिङको सूचना निकालेकोमा नेपाल चिकित्सक संघले गम्भीर ध्यानाकर्षण जनाएको छ । संघले आज विज्ञप्ति जारी गर्दै आयोगले शैक्षिक संस्थाहरुमा स्नातकोत्तर (एमडी, एमएस, एमडीएस) को सिट संख्या थप गर्ने निर्णय गरेपनि कार्यान्वयन नगरेको भन्दै आपत्ति जनाएको छ । 

हालको म्याचिङ प्रक्रिया रोकेर पूर्वनिर्धारित सिट संख्याअनुरुप म्याचिङको सूचना निकाल्नुपर्ने संघको माग छ । ‘उक्त निर्णय कार्यान्वयन नहुँदा जेहेन्दार विद्यार्थीहरु गुणस्तरीय शिक्षाको अवसरबाट वञ्चित भई ठूलो धनराजी विदेशिनुसँगै योग्य चिकित्सकहरु विदेश पलायन हुने स्थिति कायमै रहने देखिएको छ,’ विज्ञप्तिमा उल्लेख छ । नेपालमा रहेका जेहेन्दार तथा दक्ष चिकित्सकलाई मुलुकमै स्नातकोत्तर तालिमको अवसर प्रदान गर्दै नेपालमै सेवा पुर्याई समग्र आम नागरिकको स्वास्थ्य सेवामा सुविधा पुर्याउन अहिलेको म्याचिङ प्रक्रियालाई अविलम्ब रोक्न माग गरिएको हो ।

पूर्वनिर्धारित सिट संख्याअनुसार म्याचिङको सूचना निकाल्न नेपाल चिकित्सक संघले चिकित्सा शिक्षा आयोगसँग माग गरेको हो । संघले आवासीय चिकित्सकलाई निर्वाह भत्ता ४८ हजार ७३७ अविलम्ब उपलब्ध गराउन पुनः स्मरण गराएको छ ।