निर्वाचन अधिकृतलाई कालोमोसो, पेल्न खोजेको आरोप

मुलुककै पुरानो शैक्षिक संस्था मानिने त्रिचन्द्र क्याम्पसका स्ववियु निर्वाचन अधिकृतमाथि आक्रमण भएको छ । नेपाली काँग्रेसको भ्रातृ संस्था नेविसंघका बागी उम्मेदवार समूहले निर्वाचन अधिकृत अंगदमणि गौतममाथि आक्रमणपछि कालोमोसो दलेका हुन् । 

त्यहाँ अध्ययनरत एक विद्यार्थीका अनुसार निर्वाचन अधिकृत गौतमले भोलि हुन लागेको मतदानको पूर्वसन्ध्यामा सर्वदलीय बैठक बोलाएका थिए । स्ववियुका सबै उम्मेदवारहरु सहभागी बैठकमा अधिकृत गौतमले पटक पटक निर्वाचन स्थगित हुँदा विद्यार्थीहरुमा नराम्रो सन्देश गएको र कसैको असहमति भए पनि भोलि निर्वाचनको प्रक्रिया अघि बढाइने बताएका थिए ।

तर विभिन्न मागसहित असन्तुष्ट नेविसंघका बागी उम्मेदवार समूहले भने एक्कासी अधिकृत गौतममाथि हातपात गरेको हो । लगत्तै, उनीहरुले कालोमोसो दलेका थिए । क्याम्पसमा अध्ययरत ती विद्यार्थी भन्छन्, ‘निर्वाचन अधिकृतले भोलि कुनै पनि हालतमा मतदान नरोक्ने बताएपछि उनीहरु (बागी समूह) तातिएका हुन्, उनीहरुले आफ्नो माग पूरा भएपछि मात्रै निर्वाचन प्रक्रिया अघि बढाउनुपर्ने बताउँदै आएका थिए ।’

त्यसो त, नेविसंघको बागी उम्मेदवारहरुले लफडा गरेको त्रिचन्द्र क्याम्पसमा मात्रै होइन । उता त्रिवि केन्द्रीय क्याम्पसमा समेत नेविसंघकै बागी उम्मेदवारको कारण दुई पटक निर्वाचन मिति स्थगित गर्नुपरेको थियो । यद्यपि, आज मतदान सम्पन भइ अहिले मतगणना भइरहेको बुझिएको छ । नेविसंघको केन्द्रीय समिति र त्रिचन्द्र इकाइ समितिले अलग अलग उम्मेदवारलाई अघि सारेपछि लफडा शुरु भएको थियो ।