सरकारलाई पत्रकार महासंघको एकहप्ते अल्टिमेटम

नेपाल पत्रकार महासंघले तीनकुने घटनाको निशानामा परेका मिडियाको पक्षमा निर्णय लिन सरकारलाई एकहप्ते अल्टिमेटम दिएको छ । ज्यान गुमाएका पत्रकार सुरेश रजकका परिवार र आगजनी तथा ढुंगामुढा भएका सञ्चार गृहलाई क्षतिपूर्तिको व्यवस्था मिलाउन महासंघले सरकारलाई सात दिनको समय दिएको छ । 

महासंघले यस सम्बन्धमा आज गृहमन्त्री रमेश लेखक, प्रदेशका मुख्यमन्त्री र आन्तरिक मामिलामन्त्री, प्रमुख जिल्ला अधिकारीलाई ध्यानाकर्षण पत्रसमेत बुझाएको छ । पत्रमा राजावादीहरुको आगोमा जलेर ज्यान गुमाएका पत्रकार रजकको सम्बन्धमा छानबिन गरी दोषीलाई तत्काल कारबाही गर्न र उनका परिवारलाई क्षतिपूर्ति दिन, क्षति पुर्याइएका अन्नपूर्ण पोष्ट, कान्तिपुर टेलिभिजन, हिमालयन टेलिभिजनलाई क्षतिपूर्ति दिन र घाइते पत्रकारलाई क्षतिपूर्ति र निःशुल्क उपचार उपलब्ध गराउन माग गरिएको छ ।

यस्तै, विगतदेखिकै प्रेस स्वतन्त्रता उल्लंघनका घटनामा संलग्नलाई कानूनी कारबाही र सञ्चार गृह तथा सञ्चारकर्मीको सुरक्षाको उचित प्रबन्ध मिलाउन पनि माग गरिएको महासंघले जनाएको छ । माग सम्बोधन नभए सरकारविरुद्ध आन्दोलन चर्काउनेसमेत चेतावनी दिइएको छ ।