प्रधानमन्त्री उड्नुअघि आकाश होल्ड,बैंकक पुग्दा संसद अधिवेशन अन्त्य

सरकारले संसद अधिवेशन अन्त्य गर्न रास्ट्रपति रामचन्द्र पौडेलसमक्ष आज सिफारिस गर्दै छ । गएराति बसेको मन्त्रिपरिषद बैठकले आज मध्यराति १२ बजेपछि अधिवेशन अन्त्यको निर्णय गरेको छ ।

आज बिहान ११ बजे बस्ने प्रतिनिधिसभा बैठकमा सभामुख देवराज घिमिरेले अधिवेशन अन्त्यवारे जानकारी गराउँदै हुनुहुन्छ । उहाँ पनि अन्तरव्यवस्थापिका संघ (आईपीयू) को १५०औं महासभामा सहभागी हुन उच्चस्तरीय प्रतिनिधिमण्डलको नेतृत्व गर्दै करिब दुई साताको निम्ति उज्बेकिस्तान जाँदै हुनुहुन्छ । 

प्रधानमन्त्री केपी शर्मा ओली आज थाइल्याण्डको राजधानी बैंकक प्रस्थान गर्ने कार्यक्रम छ । थाइल्याण्डको भोलि एक दिन औपचारिक भ्रमण र त्यसपछि हुने बिमस्टेक सम्मेलनमा भाग लिन उहाँ दिउँसो साढे १ बजे थाइ एअरवेजको उडान नम्बर टिजी ३२० मा त्यता जान लाग्नुभएको हो । 

दिउँसो १ बजेर ५ मीनेटपछि १ बजेर ३५ मीनेटसम्म काठमाडौं वरपरको आकाशमा अन्य उडान प्रतिबन्ध (नोटाम) जारी गरिएको छ । प्रधानमन्त्री फर्कने शनिबारको दिन पनि थाइ एअरवेजको उडान काठमाडौंमा अवतरण गर्नुअघि सवा १२ बजेदेखि पौने १ बजेसम्म त्यस्तै नोटाम जारी गरिने नागरिक उड्डयन प्राधिकरणको त्रिभुवन अन्तर्राष्ट्रिय विमानस्थल कार्यालयले निर्णय गरेको छ ।

प्रधानमन्त्रीको टोलीमा परराष्टमन्त्री डा. आरजू राणा देउवा, मुख्य सचिव एकनारायण अर्याल, प्रधानमन्त्रीका दुई जना सल्लाहकार विष्णु रिमाल र युवराज खतिवडा रहनेछन् । त्यसैगरी पूर्वमन्त्री एनपी साउद, नेपाल उद्योग वाणिज्य महासंघका अध्यक्ष चन्द्रप्रसाद ढकाल, प्रतिनिधि सभा सदस्य राजकिशोर यादवलगायत पनि प्रधानमन्त्रीसँगै आज बैंकक जाँदै छन् ।