महाधिवेशन सकेर जिल्ला पुग्नासाथ एमाले पत्रकारबीच खैलाबैला

एमाले निकट पत्रकारहरुको संस्था प्रेस चौतारीको दशौं महाधिवेशन सकिए पनि असन्तुष्टिको आगो दन्केकै छ । महाधिवेशनमा सहभागी सुदूरपश्चिमका सबै जिल्ला अध्यक्ष र प्रदेश कमिटीले प्रदेश इञ्चार्जको विरोध गरेका छन् ।

मनोनीत इञ्चार्ज दिलबहादुर छन्त्याललाई मान्न आफूहरु बाध्य नभएको बताउँदै चौतारीका केन्द्रीय अध्यक्ष गणेश पाण्डेसमक्ष सामूहिक उजुरी परेको छ । चैत १४ गते बुझाइएको लिखित ध्यानाकर्षणमा महाधिवेशनमा सबै जिल्ला अध्यक्षको हस्ताक्षरसहित सिफारिसको आधारमा पठाइएका नामहरू छुटाइएको र छलफल बिनाका नामहरू अनुमोदन गरिएकोमा आपत्ति जनाइएको छ । 

लेखिएको छ, ‘इञ्चार्जको विषयमा हामी असहमत रहेको जानकारी गराउन चाहन्छौं । सङ्गठन गतिशील बनाउने, सुदृढ बनाउने,मजबुत बनाउने र एकताबद्ध बनाउने सबैभन्दा ठूलो भूमिका प्रदेश इञ्चार्जको हुने गर्दछ । तर, प्रदेश पदाधिकारी, जिल्ला अध्यक्ष र महाधिवेशनमा सहभागी प्रतिनिधिहरुसँग छलफल नगरी प्रदश इञ्चार्ज तोकिएको हुँदा तत्काल पुनर्विचारको लागि आग्रह गर्दछौं ।’

उनीहरुले सबै जिल्ला अध्यक्ष, प्रदेशका पदाधिकारी तथा केन्द्रीय सदस्यहरूको भावना समेटेर नयाँ इञ्चार्ज तोक्न अनुरोध गरेका छन् ।