संसद ‘बङ्क’ गर्नेमा काँग्रेसी सांसद अगाडि

सत्तारुढ दल नेपाली कांग्रेसका सांसदहरु हिँउदे अधिवेशनको बैठकमा सबैभन्दा कम उपस्थित भएका छन् । सभामुख देवराज घिमिरेले हिउँदे अधिवेशन अन्त्य भएको घोषणा गर्नुअघि आजको बैठकमा कम उपस्थित प्रतिनिधिसभा सदस्यहरुको नाम पढेर सुनाउनुभएको छ । 

नियमित १० वा सोभन्दा बढी बैठकमा उपस्थित नहुने सांसदहरुको अग्रपंक्तिमा मनोरमा शेरचन छिन् । स्वास्थ्य समस्याको कारण उनी २७ वटा बैठकमा अनुपस्थित रहेको सभामुख घिमिरेले जानकारी गराउनुभयो । पार्टी सभापति शेरबहादुर देउवासमेत लगातार ११ वटा बैठकमा अनुपस्थित रहेको जानकारी गराइएको छ । 

सांसदहरु लिलादेवी खिमलिम्बु, सरस्वती बजिमय, रमेश रिजाल पनि लगातार १० भन्दा बढी बैठकमा अनुपस्थित पाइएको छ । त्यस्तै, राष्ट्रिय प्रजातन्त्र पार्टीका सांसदद्वय दीपक बोहरा र गीता बस्नेत पनि बैठकमा कम उपस्थित भएका परे । तर, बोहराको आज बिहान निधन भएकाले शोक प्रस्ताव पारिद गर्दै अधिवेशन अन्त्य गरिएको हो ।