गोली खान तयार रवि हारगुहार गर्दै

राष्ट्रिय स्वतन्त्र पार्टीका सभापति रवि लामिछानेले निलम्बन भएको आफ्नो सांसद पद फुकुवाको निम्ति सभामुख देवराज घिमिरेलाई गुहारेका छन् । झण्डै छ महिनादेखि पार्टीभित्र जिम्मेवारीमा  नरहेका उनी हिजो पार्टी सभापतिको जिम्मेवारीमा फर्किएका छन ।

उनै लामिछानेले सभामुख घिमिरेलाई भेटेर सांसद पद निलम्बन फुकुवाको निम्ति आग्रह गरेका हुन् । पोखराको सूर्य दर्शन सहकारी ठगी प्रकरणमा गत कात्तिक २ गते रास्वपा पार्टी कार्यालय, घण्टीघरबाटै पक्राउ परेका उनीविरुद्ध कास्की जिल्ला अदालतमा सहकारी ठगी, संगठित अपराध र सम्पती शुद्धीकरणलगायत आरोपमा मुद्दा दर्ता भएपछि पुस ८ गतेबाट उनको सांसद पद निलम्बन भएको हो । 

तर अदालतमा मुद्दा दर्ता मात्र भएको अवस्थामा सांसद पद निलम्बन गर्न नहुने अनौठो तर्क गर्दै उनले सभामुख घिमिरेको ध्यानाकर्षण गराएका हुन् । ‘गलत मनासय राखेर दर्तामात्र गरिएको, अदालतमा टेकाइएको मुद्दाकै भरमा निलम्बन गर्न पाइँदैन भनेको छु’, भेटपछि लामिछानेले भने, ‘मुद्दा किनारा लाग्न कति समय लाग्छ, हामीलाई थाहा छ नि ! यसले भोलि प्रतिशोध बढ्दै जाने कुरा हो ।’

सभामुख घिमिरेले कानुनी परामर्श गरेर निर्णय गरिने जवाफ दिनुभएको पनि लामिछानेले बताए । ‘उहाँले कानुनी विषय हेरेर र छलफल गरेर निर्णय गर्छु भन्नुभएको छ, मुद्दा लगाएकै भरमा निलम्बन गर्दा त्यो राजनीतिक हतियार बन्न सक्नेमा उहाँ पनि सचेत भएको पाएँ’, उनले थपे । 

हिजो पार्टी सभापतिको जिम्मेवारीमा पुनः फर्केपछि रविले शरीरमा एक थोपा रगत रहुञ्जेल लुटतन्त्रको विरोधमा उभिरहने उद्घोष गरेका थिए । हिजो पार्टी कार्यालयमा बोल्दै भने, ‘अब सरकारले छातीमा गोली ठोके पनि कुनै डर छैन । जति मुद्दा लगाउन मन लगाए हुन्छ । ज्यानमाराको लगाए पनि हुन्छ । यो सरकारले बाँकी राखेको भनेको यो छातीमा गोली ठोक्न हो, त्यसको लागि पनि म तयार छु ।’ 

‘दुई वटा चोर मिल्दैमा साधु नहुने’ भन्दै उनले गठबन्धन सरकारलाई व्यङ्ग्य पनि गरेका थिए । आफूलाई तर्साउनकै लागि सरकारले पर्सामा मुद्दा दर्ता नगरेको लामिछानेको भनाइ छ । अगाडि भने, ‘म अझै केही समय शान्त बस्न चाहन्थेँ, तर यो सरकारले फाइदा उठाउँदै टाउकोमा तरबार झुन्ड्याएपछि डराउँछ भनेर होला, एउटा अदालतमा त मुद्दा नै नबुझाएर राखेको छ’, उनले भने, ‘सरकारलाई लागेको होला, टाउकोमा तरबार झुन्ड्याएपछि म डराउँछु, तर याद रहोस्, तिमीहरुले जुनसुकै बेला तरबार खसाले पनि म शीर थाप्न तयार छु ।’

आगामी शनिबार निर्वाचन क्षेत्र (चिवतन) पुगेर जनतासामु वर्तमान सरकारको भण्डाफोर गर्ने उनको तयारी छ । आफ्नो योजना सुनाउँदै भने, ‘शनिबार म चितवन जाँदैछु, जनतालाई म सुनाउन चाहन्छु, आखिर सरकार कसरी ढालियो ? कस्ले ढाल्यो ? कसको हातमा हतकडी हुनुपथ्र्यो ? सबै भन्छु ।’