कतै आगो दन्दनी, कतै सेल्फी धमाधम

‘कसैलाई के धन्दा,घरज्वाइँलाई खानकै धन्दा’ भन्ने प्रचलित नेपाली उखानसँग मिल्दोजुल्दो हर्कत राजावादी आन्दोलनमा देखिएको छ । जनताले ठूलो संघर्ष गरेर दफ्नाइसकेको राजतन्त्र फर्काउन सडकमा उत्रिएकाहरु एजेण्डा भन्दा पनि आफ्नै दुनियाँमा मस्तमगन थिए । गएको शुक्रबार राजधानीको तीनकुनेमा राजावादी समूहले प्रदर्शन गर्यो । 

विवादास्पद मेडिकल व्यवसायी दुर्गा प्रसाईंलाई आन्दोलनको कमाण्डर तोकिएको थियो । राजतन्त्रको मुकुट लगाएर आफ्नो स्वार्थको रोटी सेक्न आन्दोलनको नेतृत्व गरेका प्रसाईंले भीडलाई उक्साउँदा प्रदर्शन उग्र बन्न पुग्यो । सो घटनामा एक पत्रकारसहित दुई जनाले ज्यान गुमाए । सयौं घाइते भए । भौतिक सम्पत्तिमा करोडौंको क्षति पुग्यो । सरकारको औषधी कारखाना जलेर ध्वस्त भयो ।  

आगजनी, तोडफोड, लुटपाट, ढुंगामुढालगायतका अपराधिक गतिविधि भए । रोचक कुरा के भने, त्यस्तो भयवित अवस्थामा पनि एक व्यक्ति आनन्दले सेल्फी खिचिरहेका थिए, टिकटक बनाइरहेका थिए । जबकि, उनको साइडमा रहेको घरमा दन्दनी आगो बलिरहेको थियो । तैपनि उनलाई त्यो आक्रान्त माहौलले कुनै फरक पारेको थिएन् । थरिथरिका पोज दिएर सेल्फी लिइरहेका थिए, कहिले बसेर त कहिले उठेर । 

ती व्यक्ति हाल सामाजिक सञ्जालभर छाएका छन् । उनले फोटो खिचिरहेको भिडियो फेसबुकमा भाइरल भएको छ । सो भिडियोमा हजारौं भ्युज र सयौं कमेण्ट आएको छ । कसैले सो भिडियोमा राम्रो कमेण्ट गरेका छन् भने कसैले मजाक उडाइरहेका छन् । सामाजिक सञ्जाल प्रयोगकर्ता एस्का केसीले रोडमा गाडी नगुडेको फाइदा उठाएको भन्दै कटाक्ष गरेकी छिन् । 

उनले लेखेकी छिन्,‘अरुलाई ढुंगामुढा गर्नुभन्दा आफ्नै फोटो खिचेर बस्यो ठीकै गर्यो किनकि आन्दोलन गरेर केही फाइदा छैन् । ज्यानको जोखिम फोटो त राम्रो आउँछ कमसेकम । रोडमा गाडी नआएको बेला मौका छोपेको खिच भाइ खिच ।’

अमोस श्रेष्ठले सबैलाई आफ्नै संसार प्यारो भएको टिप्पणी गरेका छन् । ‘ब्रदरलाई आफ्नै संसार प्यारो, चिलमा’,उनले भनेका छन् । त्यसैगरी स्पन्दन राईले नेपालीलाई चान्सको मात्रै आवश्यक रहेको बताएका छन् । लेख्छन्,‘नेपाली होनि चान्स पाएसी जेनि गर्छ भन्थे हो रच ।’