महर्जनको पोष्टमार्टम रिपोर्ट : छातीमा लागेको गोली ढाडबाट बाहिर

राजावादीहरुले शुक्रबार आयोजना गरेको तीनकुनेको प्रदर्शनमा ज्यान गुमाएका सविन महर्जनको पोस्टमार्टम रिर्पोट सार्वजनिक भएको छ । महाराजगञ्जस्थित त्रिवि शिक्षण अस्पतालले उनको छातीको दायाँ भाग (दाहिने कुहिनोतिर)मा गोली लागेको कारण मृत्यु भएको जनाएको छ । गोली ढाड छेडेर बाहिर निस्किएको रिपोर्टमा उल्लेख छ । 

कीर्तिपुरका महर्जन गत शुक्रबार राजावादीहरुको हिंसात्मक प्रदर्शनको क्रममा गोली लागेर ढलेका थिए । उनलाई कसले गोली हान्यो भन्नेबारे अझै खुल्न सकेको छैन । उनी प्रदर्शनकारी थिए वा दर्शक मात्र थिए, त्यो पनि यकिन भइसकेको छैन । पेशाले चालक रहेका उनी गाडी मर्मत गर्न घरबाट निस्किएको परिवारको भनाइ छ । 

राजावादीले प्रहरीको गोली लागेर महर्जनको मृत्यु भएको दावी गरिरहँदा उता गृह मन्त्रालयले भने स्वीकार गरिसकेको छैन । गृहमन्त्री रमेश लेखकले सुरक्षा निकाय प्रमुखहरुलाई घटनामा संलग्नहरुको खोजी गरी कारबाहीका लागि निर्देशन दिनुभएको छ । 

सोही दिन पत्रकार सुरेश रजकको पनि प्रदर्शनकारीले लगाएको आगोमा जलेर मृत्यु भएको थियो । उनको मृत्युलाई पनि शंकास्पद र रहस्यमय बनाउने नयाँ नयाँ भिडियो तथा फोटोहरु सार्वजनिक भइरहेका छन् । उक्त घटनामा संलग्न रहेको आरोपमा हालसम्म प्रहरीले डेढ सयभन्दा बढी व्यक्तिलाई पक्राउ गरेर अनुसन्धान गरिरहेको छ ।