नेताहरु छुट्ने लिङ्देनको विश्वास

राष्ट्रिय प्रजातन्त्र पार्टीका अध्यक्ष राजेन्द्र लिङ्देनले प्रहरी हिरासतमा रहेका वरिष्ठ उपाध्यक्ष रविन्द्र मिश्र र महामन्त्री धवलशमशेर राणालाई भेटेका छन् । आज अपरान्ह भद्रकालीस्थित काठमाडौँ प्रहरी परिसरमा पुगेर भेटेपछि  उनीहरु छुट्ने बताएका हुन् ।

गत शुक्रबार राजावादीहरुले तीनकुने क्षेत्रमा आयोजना गरेको हिंसात्मक प्रदर्शनमा दुई जनाको मृत्यु भएपछि प्रहरीले सोही राति मिश्र र राणालाई नियन्त्रणमा लिएको थियो । भोलिपल्ट (शनिबार) उनीहरुलाई भेटेर अध्यक्ष लिङ्देनले २४ घण्टाभित्र रिहा गर्न सरकारलाई अल्टिमेटम थिएका थिए । तर मिश्र र राणासहित ११ जनाविरुद्ध राज्यविरुद्धको कसुर र सांगठनिक अपराधको मुद्दा दर्ता गर्ने प्रहरीको तयारी छ । घटनाका मुख्य नाइके एवम् जनकमाण्डर भनिएका दुर्गा प्रसाईं फरार छन् । 

उक्त दिन भीड नियन्त्रण गर्न सुरक्षामकर्मीहरुले केही राउण्ड गोली र अश्रुग्यास प्रहार गरेका थिए । त्यो दिन २४ वटा लाठी पनि भाँचिएको बताइन्छ । 

घटनामा नेपाल प्रहरीका ५५, सशस्त्र प्रहरी बलका २२ जना र ६० भन्दा बढी प्रदर्शनकारी घाइते भएका थिए । १२ सुरक्षाकर्मीसहित केही प्रदर्शनकारीको अहिले पनि विभिन्न अस्पतालमा उपचार भइरहेको छ ।