गृहनगरमा अन्तिम श्रद्धाञ्जलीपछि बोहराको पार्थिव शरीर काठमाडौंमा

राष्ट्रिय प्रजातन्त्र पार्टीका नेता तथा रुपन्देहीको निर्वाचन क्षेत्र नम्बर ३ का सांसद दीपक बोहराको पार्थिव शरीरलाई गृहनगर सिद्धार्थनगर पुर्याइएको छ । घाँटीको क्यान्सरका कारण तीन वर्षदेखि बोल्न असहजको अवस्था झेल्दै आएका उनको आज बिहान राजधानीको ओम अस्पतालमा निधन भएको हो । घरमै रहेका बोहरालाई रोगले च्यापेपछि बिहान अस्पताल पुर्याइएको थियो । 

उनको पार्थिक शरीरलाई नेपाली सेनाको हेलिकोप्टरमा दिउँसो भैरहवा पुर्याइएको हो । भैरहवा बजार परिक्रमालगत्तै पार्टी कार्यालयसमेत रहेको उनको घरमा श्रद्धाञ्जली दिएपछि बेलुकी काठमाडौं ल्याइएको छ । भोलि राप्रपा पार्टी कार्यालय, धुम्बाराहीमा श्रद्धाञ्जली दिएपछि आर्यघाटमा दाहसंस्कार गरिने बताइएको छ ।

बोहरालाई अन्तिम श्रद्धाञ्जली दिन निवासमा भैरहवामा ठूलो भीड लागेको थियो । एमाले पोलिटब्युरो सदस्यद्वय लिला गिरी, दधिराम न्यौपाने, नेता खिमलाल भट्टराईसहित सबैजसो पार्टीका नेता कार्यकर्ता बोहरा निवास पुगेका थिए । 
जेठी पत्नी मञ्जुसँग सम्बन्ध बिच्छेद गरेर कान्छी उन्नतीसँग बस्दै आएका बोहराका दुई छोरा छन् । जेठीतर्फका गौरब बुद्ध एयरका पाइलट र कान्छीतर्फका प्रज्वल व्यापारी हुन् । उन्नतीतर्फकी छोरी चाँदनी जेनी बोहरा ग्यारेटको ४७ दिनअघि हृदयाघातबाट ४६ वर्षको उमेरमा निधन भएको थियो । 

यसबीच पूर्वमन्त्री तथा सांसद बोहराको निधनको शोकमा सिद्धार्थनगर नगरपालिकाले भोलि सार्वजनिक बिदाको घोषणा गरेको छ ।

२०३६ सालबाट राजनीतिमा सक्रिय बोहरा मर्चवारबाट पहिलो पटक वडाध्यक्षमाक निर्वाचित भएका थिए । दुईपटक राष्ट्रिय पञ्चायत सदस्य र मन्त्रीसमेत बने । पञ्चायत, बहुदल र गणतन्त्र तीनवटै व्यवस्थामा १० पटक विभिन्न मन्त्रालयको जिम्मेवारीमा रहे । पछिल्लो पटक २०७९ को निर्वाचनमा एमालेको सहयोगमा बोहराले तत्कालीन गृहमन्त्री बालकृष्ण खाँणलाई हराएर चर्चा बटुलेका थिए । ‘भ्वाइस रेष्ट’का कारण मतदातासँग नबोलेरै बहालवाला गृहमन्त्री हराउनु निकै ठूलो चुनौती थियो ।