जिल्ला जिल्लामा कार्यकर्ता खोज्दै राजावादी

अन्तिम राजा ज्ञानेन्द्र शाहको इसारामा गठन भएको नवराज सुवेदी नेतृत्वको 'राजसंस्था पुनर्स्थापनाका लागि संयुक्त जनआन्दोलन समिति' ले आन्दोलनलाई जिल्ला तहमा विस्तार गर्न कार्यकर्ता खोजी गरेको छ ।   

समितिका प्रवक्ता स्वागत नेपालले वक्तव्य जारी गर्दै जिल्लास्तरको आन्दोलनलाई नेतृत्व गर्न चाहने र जिम्मेवारी निभाउन सक्नेलाई सम्पर्कमा आउन भएका छन् । योग्य, देशभक्त र राष्ट्रवादी व्यक्तिको नेतृत्वमा आन्दोलन परिचालन समिति गठन गर्ने भनिएको छ । 

समितिले जनआन्दोलनलाई चरणबद्ध रुपमा अघि लैजाने उद्घोष पनि गरेको छ । प्रचारात्मक कार्यक्रमदेखि अनिश्चितकालीन आमहड्ताल र अकुपाइ नारायणहिटी घोषणा गर्ने समितिको तयारी छ ।

‘श्री ५ महाराजाधिराज सरकारको त्रिभुवन अन्तराष्ट्रिय विमानस्थलदेखि निर्मल निवाससम्मको स्वागत कार्यक्रम मात्र थियो, जनआन्दोलन थिएन । कोटेश्वर तीनकुनेमा आयोजित कार्यक्रम पनि आन्दोलन थिएन, अभियानका आफ्ना नीतिहरु घोषणा गर्ने कार्यक्रम मात्र थियो’, वक्तव्यमा भनिएको छ, ‘आन्दोलन कमजोर बनेको भन्ने देशविरोधी र निरकुंशतावादीहरुले सिर्जना गर्न खोजेको भाष्य मात्र हो, शुरु नै नभएको आन्दोलन कमजोर हुने भन्ने प्रश्नै रहँदैन ।’

त्यसो त, अहिले आन्दोलन समितिको नेतृत्व प्रा.डा जगमान गुरुङले सम्हालिरहेका छन् । पूर्वराजाले तोकेका ८७ वर्षे सुवेदी घरमै नजरबन्दमा परेपछि अर्का बृद्ध गुरुङले आन्दोलन हाँक्ने जिम्मेवारी पाएका हुन् । निर्मल निवासबाटै जनकमाण्डर बनाइएका दुर्गा प्रसाईं बेपत्ता छन् भने सचिव रविन्द्र मिश्र हिरासतमा छन् । 

प्रसाई र मिश्रहरुकै कारण चैत १५ गतेको प्रदर्शन हिंसात्मक बनेको र यसले राजावादी आन्दोलन नै अप्ठेरोमा परेको विश्लेषण भैरहँदा नेपाल प्रज्ञा प्रतिष्ठानका पूर्व उपकुलपतिसमेत रहेका गुरुङले नेतृत्व गर्ने आन्दोलन कस्तो होला ? भन्ने एकथरीले चासो राखिरहेको अवस्था छ । नेतृत्व सम्हालेलगत्तै ‘दुर्गा प्रसाई धारिलो फलाम हो, हतियार बनाउनुपर्छ’ भन्ने उनको अभिव्यक्तिले भने आन्दोलनको भविष्य नै अन्यौलमा परेको देखिन्छ । 

उता, राजाकै नाममा राजनीति गरिरहेको राष्ट्रिय प्रजातन्त्र पार्टीले पनि आगामी चैत २५ गते काठमाडौँमा प्रदर्शन गर्दैछ । जसको नेतृत्व पार्टी अध्यक्ष राजेन्द्र लिङदेनले गर्दैछन् । राप्रपाले अब देखि दुर्गा प्रसाईं समूहको कार्यक्रममा पुर्नविचार गरेर मात्र सहभागी हुन नेता तथा कार्यकर्तालाई निर्देशक दिएको बुझिएको छ ।