प्रधानमन्त्रीद्वारा थाइल्याण्डमा पनि ‘समृद्ध नेपाल, सुखी नेपाली’ कै कुरा

बहुक्षेत्रीय प्राविधिक तथा आर्थिक सहयोगको लागि बंगालको खाडीको प्रयास (बिम्स्टेक)को छैटौँ शिखर सम्मेलनको आज औपचारिक उद्घाटन भएको छ । थाइल्याण्डको बैंककस्थित होटल सांग्रिलामा सात वटै सदस्य राष्ट्रका शीर्ष नेताहरुको उपस्थितिमा भव्य उद्धघाटन गरिएको हो । 

सम्मेलनका सहभागी हुन प्रधानमन्त्री केपी शर्मा ओली ५० सदस्यीय प्रतिनिधिमण्डलको नेतृत्व गर्दै अस्ति दिउँसो बैंकक पुग्नुभएको थियो । भारतीय प्रधानमन्त्री नरेन्द्र मोदी, बंगलादेशका प्रमुख सल्लाहकार मोहम्मद युनुसलगायत हिजो बिहान पुग्नुभएको थियो । 

शिखर सम्मेलनमा निर्धारित क्षेत्रीय कार्यसूची पेश र म्यान्मारमा गएको भूकम्प प्रभावितकाका लागि प्रार्थना पारित गरेपछि शीर्ष नेतृत्वको सम्बोधन शुरु भएको छ । सम्मेलनलाई सम्बोधन गर्दै प्रधानमन्त्री ओलीले ‘बिम्स्टेक’ शिखर सम्मेलनका मुख्य अन्तरवस्तु र संयुक्त राष्ट्रसङ्घको दिगो विकास लक्ष्यसँग नेपालले लिएको ‘समृद्ध नेपाल, सुखी नेपाली’को राष्ट्रिय आकाङ्क्षा गहिरोसँग प्रतिध्वनित हुने धारणा राख्नुभयो ।

बिम्स्टेकले परिवर्तनशील समयलाई मात्र नभई हाम्रो क्षेत्रीय सहयोगलाई पुनःजीवित गर्ने अवसरलाई सदुपयोग गर्नुपर्नेमा उहाँले जोडसमेत दिनुभएको छ । सम्मेलनमा बङ्गलादेश, भुटान, भारत, म्यान्मार र श्रीलङ्काका प्रधानमन्त्रीहरुले सम्बोधन गरेका छन् । अन्त्यमा थाइ प्रधानमन्त्री पे थोङ् थान् शिनावात्राले सम्मानसहितको धारणा राखेपछि सम्मेलन समापन हुनेछ । 

आज बिहान प्रधानमन्त्री ओलीले म्यान्मारका सैनिक प्रमुख जनरल मिन आंग सेसँग अनौपाचारिक भेटवार्ता गर्नुभएको थियो । आमन्त्रित शीर्ष पाहुनाहरुको लागि ३८ वर्षीया थाइ प्रधानमन्त्री शिनावात्राले हिजो साँझ डिनर आयोजनासमेत गर्नुभएको थियो । 

बिम्स्टेक सात देशको क्षेत्रीय संगठन हो । बिम्स्टेक अर्थात् बे अफ बंगाल इनिसियटिभ फर मल्टी सेक्टर टेक्निकल एण्ड इकोनोमिक्सको ओपरेशनको मुख्य कार्यालय ढाकामा छ । 

सन् १९९७ मा आर्थिक सहायतका उद्धेश्य राखेर बंगलादेश, भारत, श्रीलंका र थाइल्याण्ड मिलेर यो संगठन गठन गरेका थिए । त्यसको एक वर्षपछि श्रीललंका पनि आवद्ध भएको थियो । भूटान र नेपाल भने सन् २००४ सदस्य बनेका  हुन् ।