मोरङमा सशस्त्रको वार्षिकोत्सव धुमधाम

पिठोले बनेको मीठो केकलाई टिलिक्क टल्कने सानो खन्जरले काटेर बाँडचुडी खुवाउँदै शसस्त्र प्रहरी बल नेपालको मोरङ ३, नम्बर गणले आफनो बिसौं स्थापना दिवस मनाएको छ । स्थापना दिवसमा बूढीगंगा गाउँपालिका १ मा रहेको उक्त गणले विविध कार्यक्रम आयोजना गरेको छ । 

कोशी प्रदेश पृतनाका डिआइजी शम्भुप्रसाद सुवेदी र मोरङका प्रमुख जिल्ला अधिकारी इनरदेव यादवले केक संयुक्त रुपमा केक काटेका हुन् । शुभकामना मन्तव्यमा सुवेदीले सीमित स्रोत साधनका वावजुद चुनौती मोल्दै शान्ति सुरक्षामा निरन्तर खटिएर परिणाम दिलाउन सक्नु नै असल सुरक्षाकर्मीको परिचय भएको बताए । उनले नागरिकको सेवामा शसस्त्र प्रहरी सँधै सक्रिय हुने उनको दाबी छ । 

 
मोरङका प्रमुख जिल्ला अधिकारी इनरदेव यादवले विपद् व्यवस्थापन र सीमा सुरक्षामा शसस्त्र प्रहरी अब्बल रहेकाले थप प्रभावकारितको निम्ति शुभकामना दिए । बुढीगंगा गाउँपालिका अध्यक्ष जितनाराण थापाले शसस्त्र प्रहरीको मोरङकै सबैभन्दा ठूलो गण आफनो पालिकामा हुँदा आफूहरुलाई गर्व लागेको बताए । उनले विगतमा झैँ आगामी दिनमा पनि आवश्यक सहयोग र सहकार्य गर्दै जाने विश्वास दिलाएका छन् । 

गणपति एसपी राजेश घिमिरिले गणको सेवालाई प्रभावकारी बनाउन आवश्यक सुधार गर्दै लैजाने प्रतिबद्धता जनाए । शसस्त्र प्रहरीको जिल्ला मुख्यालय ३ नम्बर गण सीमा सुरक्षा सुरक्षा, चोरी तस्करी नियन्त्रण, विपद उद्धारदेखि, शान्ति सुरक्षामा खटिँदै आाएको छ ।

सो अवसरमा विभिन्न विधामा उत्कृष्ट प्रहरी र सहयोगी दाताहरुलाई प्रमाणपत्रसहित सम्मान गरिएको थियो । कार्यक्रममा कर्मचारीले सांगीतिक प्रस्तुती गरेका थिए ।